Dhule Crime : आर्थिक व्यवहारातून झालेल्या ओळखीचा फायदा घेत पेढ्यातून गुंगीचे औषध देऊन शारीरिक संबंधाचा व्हिडिओ व्हायरल करण्याची धमकी देत ६० लाख रुपये उकळून सलग सव्वा दोन वर्ष अत्याचार करणाऱ्या मुख्याध्यापकाविरोधात ४१ वर्षीय महिलेने दिलेल्या तक्रारीवरून पश्चिम देवपूर पोलीस स्टेशन येथे गुन्हा दाखल झाला आहे. गुन्हा दाखल होताच पश्चिम देवपूर पोलिसांनी ज्या मुख्याध्यापकाविरोधात तक्रार आली होती त्याला अटक केली आहे.
नेमकी घटना काय?
मुख्याध्यापकाने पीडित महिलेला आर्थिक मदत केली होती. या आर्थिक मदतीतून ओळख झाल्याने मुख्याध्यापकांनी पीडित महिलेच्या घरी जाऊन पेढ्यांमध्ये गुंगीचे औषध देत महिलेवर अत्याचार केला. एवढ्यावरच या नराधम मुख्याध्यापकाने न थांबता पिढीत महिला सोबत केलेल्या शारीरिक संबंधाचा व्हिडिओ वायरल करण्याची धमकी देऊन तब्बल ६० लाख रुपये उकळत ब्लॅकमेल करत तब्बल सव्वा दोन वर्ष महिलेवर अत्याचार केला. अखेर महिलेने देवपूर पोलीस स्टेशन गाठत नराधम मुख्याध्यापकाविरोधात तक्रार दाखल केल्याने पश्चिम देवपूर पोलीस स्टेशन येथे विविध कलमान्वये मुख्याध्यापकाच्या विरोधात गुन्हा दाखल करण्यात आला आहे. पोलिसांनी तातडीने मुख्याध्यापकाला ताब्यात घेत गजाआड केले आहे. घडलेल्या घटनेमुळे धुळ्यात खळबळ उडाली आहे. या प्रकरणाचा अधिक तपास पश्चिम देवपूर पोलीस करत आहेत.
१७ ऑगस्ट २०२३ ला काय घडलंं?
पोलिसांनी दिलेल्या माहितीनुसार आरोप झालेला मुख्याध्यापक आणि पीडित महिलेची ओळख काही काळापूर्वी झाली होती. आर्थिक अडचणींमध्ये या मुख्याध्यापकाने मदत केली आणि त्यातून त्यांच्या संपर्कात वाढ झाली. याच जवळीकपणाचा फायदा घेऊन १७ ऑगस्ट २०२३ रोजी दुपारी साडेबाराच्या सुमारास त्याने महिलेला पेढ्यातून आणलेले गुंगीचे औषध दिले. औषधाचा परिणाम झाल्याने महिला बेशुद्ध पडली आणि त्या अवस्थेत तिच्यावर अत्याचार करण्यात आला. याच वेळी मुख्याध्यापकाने पूर्ण घटना आपल्या मोबाईलवर रेकॉर्ड केली. हाच व्हिडीओ दाखवून तो मुख्याध्यापक तिला ब्लॅकमेल करत होता.
पोलिसांनी शनिवारी रात्रीच आरोपीला केली अटक
दीर्घकाळ चाललेल्या त्रासामुळे अखेर पीडित महिलेने धीर एकवटत पश्चिम देवपूर पोलिस ठाण्यात तक्रार नोंदवली. तक्रारीचे गांभीर्य लक्षात घेत पोलिसांनी रात्रीच मुख्याध्यापका विरोधात गुन्हा नोंदवून त्याला बेड्या ठोकल्या. पुढील तपास पोलिस निरीक्षकांच्या मार्गदर्शनाखाली सुरू आहे. या घटनेने धुळे शहरात मोठी खळबळ उडाली असून, एका जबाबदार पदावरील व्यक्तीकडून असं कृत्य केलं गेल्याने प्रचंड संताप व्यक्त केला जात आहे.