सातारा : दिवाळीचा सर्वत्र उत्साह असून, सोमवारी उत्साहात साजरी झालेली नरक चतुर्दशी आणि त्यानंतर लक्ष्मीपूजन, दीपावली पाडवा, भाऊबीजेच्या खरेदीसाठी सातारा शहरासह जिल्ह्यात सर्वच मुख्य बाजारपेठांमध्ये नागरिकांची गर्दी उसळली आहे. दिवाळी सणाचा पारंपरिक उत्साह सर्वत्र दिसून येत आहे.
दरवर्षी दिवाळीनिमित्त कपड्यांची मोठी खरेदी केली जाते. यातही पाडवा, भाऊबीजेसाठी तयार कपडे मोठ्या प्रमाणात खरेदी केले जातात. यासाठी साताऱ्यातील कपड्यांच्या बाजारपेठांमध्ये खरेदीला प्रचंड उत्साह पाहायला मिळत आहे. महिलांसाठी साड्या, तयार ड्रेस, तर पुरुषांसाठी जॅकेट आणि पारंपरिक पोशाखांची विक्री मोठ्या प्रमाणात होत आहे. दिवाळीनिमित्त दुकानदारांकडून ग्राहकांसाठी विविध सवलती, बक्षीस योजना जाहीर केलेल्या आहेत. दिवाळीचा मूहूर्त आणि खरेदीवरील सवलतींमुळे ग्राहकांची खरेदीसाठी झुंबड उडत असल्याचे पाहायला मिळत आहे.
दरम्यान आकाशकंदील, तोरणे, फटाके आणि तयार फराळांच्या दुकानांमध्येही ग्राहकांची मोठी गर्दी दिसत आहे. नवे कपडे, गृहसजावटीचे साहित्य, फराळ, फटाके आणि रांगोळीच्या साहित्यांना मोठी मागणी होती. बाजारपेठांमध्ये रंगीबेरंगी दिवे, आकर्षक तोरणे आणि कंदील विक्रीसाठी आले आहेत.
दारासमोर लावण्यासाठी विविध प्रकारच्या पणत्या आणि मेणबत्त्या उपलब्ध असून, लाल मातीच्या पणत्या ३० रुपयांपासून मिळत आहेत, मोती आणि काच तुकड्यांनी सजवलेल्या पणत्या ६० ते ३०० रुपयांपर्यंत रांगोळीच्या साच्यांनाही मोठी मागणी असून, १५० रुपयांपर्यत विविध आकारांतील साचे मिळत आहेत. मोती आणि काच तुकड्यांनी सजवलेल्या पणत्या ६० ते ३०० रुपयांपर्यंत आहेत. रांगोळीच्या साच्यांनाही मोठी मागणी असून, २० ते १५० रुपयांपर्यंत विविध आकारांतील साचे विक्रीसाठी आहेत. विशेषतः मोती चीक खण आळी पोवई नाका, रविवार पेठ आणि राजपथावर सोमवारी सकाळपासूनच गदी आहे. विशेषतः महिलांची उपस्थिती मोठ्या प्रमाणावर दिसून येत होती. येथील फटाक्यांच्या बाजारातही खरेदीचा उत्साह शिगेला पोहोचला असून, गर्दीवर नियंत्रण ठेवण्यासाठी पोलीस बंदोबस्त तसेच खबरदारीचा उपाय म्हणून अग्निशामक दल तैनात करण्यात आले आहे.