MP Praniti Shinde on CM Devendra Fadnavis over Satara Phaltan Women Doctor Death Case : साताऱ्यातील फलटण येथे उपजिल्हा रुग्णालयात कार्यरत असलेल्या एका महिला डॉक्टरने आत्महत्या केल्याच्या घटनेनंतर संपूर्ण राज्यात खळबळ उडाली आहे. या महिला डॉक्टरने स्वत:चं जीवन संपवण्यापूर्वी तळहातावर सुसाइड नोट लिहिली होती, ज्यामध्ये काही जणांची नावे घेत गंभीर आरोप करण्यात आले होते. या घटनेवर राज्यभरातून संतप्त प्रतिक्रिया उमटत असून विरोधकांकडून सत्ताधारी पक्षांवर आणि राज्याचे गृहमंत्री देवेंद्र फडणवीस यांच्यावर जोरदार टीका केली जात आहे.
यादरम्यान काँग्रेसच्या खासदार प्रणिती शिंदे यांनी आज मयत महिला डॉक्टरच्या कुटुंबीयांची भेट घेतली. बीड जिल्ह्यातील त्यांच्या घरी जाऊन त्यांनी ही भेट घेतली आहे. यावेळी प्रणिती शिंदे यांनी कुटुंबीयांशी संवाद साधत विचारपूस केली आणि त्यांचे सांत्वन केले. यावेळी त्यांनी या प्रकरणात न्याय मिळवून देण्यासाठी मी आपल्या सोबत आहे, असा शब्द देखील त्यांनी दिला.
खासदार प्रणिती शिंदे यांनी यावेळी राज्याचे मुख्यमंत्री तथा गृहमंत्री देवेंद्र फडणवीस यांच्यावर जोरदार टीका केल्याचे पाहायला मिळाले. इतकेच नाही तर त्यांनी यावेळी गृहमंत्र्यांच्या राजीनाम्याचीही मागणी केली.
प्रणिती शिंदे म्हणाल्या की, “राज्याचे गृहमंत्री अथवा मुख्यमंत्री वारंवार तक्रार करूनसुद्धा महिलांना संरक्षण देण्यापेक्षा महिला खासदारांवर खालच्या पातळीवर जाऊन टीका करण्यातच वेळ वाया घालवतात. पण जेव्हा महिलांना संरक्षण देण्याची वेळ येते तेव्हा मात्र मुख्यमंत्री आणि गृहमंत्री हे हात वर करतात, ज्यामुळे त्यांनी महाराष्ट्राची संस्कृतीची पातळी एकदम खालच्या स्तरावर आणली आहे. मला असं वाटतं की मुख्यमंत्री- गृहमंत्र्यांनी राजीनामा देणं गरजेचं आहे.”
मुख्य संशयित आरोपी पीएसआय पोलिसांना शरण
दरम्यान या प्रकरणात नुकतेच मोठी अपडेट समोर आली आहे. या प्रकरणातील मुख्य संशयित आरोपी पीएसआय पोलिसांना शरण आल्याची माहिती समोर आली आहे. या प्रकरणात पोलिसांनी शनिवारी संशयित आरोपी प्रशांत बनकरला अटक केली होती, त्यानंतर शनिवारी रात्री उशिरा मुख्य संशयित आरोपी निलंबित पीएसआय गोपाळ बदने हा पोलिसांना शरण आला, त्यानंतर पोलिसांनी त्याला अटक केलं असून या प्रकरणातील ही दुसरी अटक आहे. या संदर्भातील वृत्त एएनआय या वृत्तसंस्थने दिलं आहे.