अलिबाग- खांदेरी किल्ल्याजवळ उरण येथील एक मासेमारी बोट बुडाली आहे. ज्यातील तीन जण बेपत्ता असून, पाच जण पोहत किनाऱ्याला आले आहेत.
उरण तालुक्‍यातील करंजा येथील मनोहर गणपत कोळी यांच्‍या मालकीची तुळजाई नावाची मच्छीमार बोट आज सकाळी ७ वाजता समुद्रात मासेमारीसाठी निघाली. सकाळी साडेआठ वाजण्‍याच्‍या सुमारास खांदेरी किल्ल्याजवळ आली असता ही बोट लाटांच्या जोरदार माऱ्याने बुडाली. बोटीवरील ५ खलाशांनी ९ तास पोहत संध्याकाळी किनारा गाठला. तर अन्य तीन जण बेपत्ता आहेत. मांडवा सागरी पोलीस अधिक तपास करीत आहेत.
हेमंत बळीराम गावंड रा. आवरे, संदीप तुकाराम कोळी रा. करंजा, रोशन भगवान कोळी रा. करंजा, शंकर हिरा भोईर रा. आपटा, कृष्‍णा राम भोईर रा. आपटा असे पोहत किनाऱ्यावर आलेल्‍या खलांशांची नावे आहेत. तर नरेश राम शेलार, धीरज कोळी आणि मुकेश यशवंत पाटील हे तिघे खलाशी बेपत्ता आहेत. त्यांचा ड्रोनच्‍या मदतीने शोध सुरू करण्‍यात आला आहे. मासेमारी बंदी असताना ही बोट मासेमारीसाठी गेली होती.