विषारी किडा चावल्याने दहा शालेय मुले रुग्णालयात

महाबळेश्वर तालुक्यातील गोगावले येथे विषारी किडा चावल्याने दहा शाळकरी मुलांना रुग्णालयात दाखल केले आहे. यातील दोघांची प्रकृती गंभीर आहे.
गोगावले येथे कोयना शिक्षण प्रसारक मंडळाची शाळा आहे. या शाळेतील सहा मुली व चार मुलांना काल सायंकाळी सातच्या दरम्यान अभ्यास करत असताना विषारी किडा चावला. त्यानंतर थोडया वेळाने मुलांच्या अंगाला खाज सुटायला लागली. तेथील ग्रामीण रुग्णालयात उपचार घेतल्यानंतर थोडा वेळ त्यांना बरे वाटले, मात्र नंतर त्यांना पुन्हा त्रास सुरु झाल्याने त्यांना सातारा येथील ‘सिव्हील हॉस्पीटल’मध्ये दाखल करण्यात आले. तोपर्यत त्यातील दोन मुली अत्यवस्थ झाल्या होत्या. या घटनेमुळे परिसरात काळजीचे वातावरण तयार झाले.आहे. हा परिसर दुर्गम व डोंगराळ भागात येत असल्याने या मुलींना कोणत्या प्रकारचा किडा चावला असेल याची माहिती मिळू शकली नाही. आरोग्य विभागाने या परिसराची पाहणी केली असून शाळा परिसरात कीटकनाशक फवारणी करण्यात आली आहे, अशी माहिती तहसीलदार अतुल म्हेत्रे व प्रांताधिकारी रवी खेबूडकर यांनी दिली. या मुला-मुलींची प्रकृती सुधारत असून दोन मुलींना असणारा धोका टळला आहे, असेही त्यांनी सांगितले.