सावंतवाडी: येथील यशवंतराव भोसले कॉलेज ऑफ फार्मसीमध्ये जागतिक फार्मासिस्ट दिन मोठ्या उत्साहात साजरा करण्यात आला. या निमित्ताने आयोजित केलेल्या विविध स्पर्धा, मान्यवरांचे मार्गदर्शन आणि ‘फार्मासिस्ट ऑफ द इयर’ पुरस्काराने कार्यक्रमाला एक वेगळी उंची प्राप्त झाली. स्पर्धांमधून विद्यार्थ्यांच्या कल्पकतेला वाव या दिनाच्या औचित्याने फार्मा लोगो, फार्मा स्लोगन आणि फार्मा रांगोळी अशा विविध स्पर्धा आयोजित करण्यात आल्या होत्या, ज्यातून विद्यार्थ्यांना त्यांच्या कल्पकतेला वाव मिळाला.
कार्यक्रमाचे मुख्य आकर्षण ठरलेला यंदाचा ‘फार्मासिस्ट ऑफ द इयर’ पुरस्कार देवगड येथील ज्येष्ठ फार्मासिस्ट श्रीपाद कुळकर्णी यांना प्रदान करण्यात आला. सत्तर वर्षांहून अधिक काळ कुळकर्णी यांचे कुटुंब फार्मसी व्यवसायाच्या माध्यमातून देवगडवासियांची प्रामाणिकपणे सेवा करत आहे. हा पुरस्कार मिळाल्यानंतर त्यांनी आपल्या मनोगतात सचोटी, प्रामाणिकपणा आणि शिस्त या गुणांवर भर दिला. “ग्रामीण भागात वैद्यकीय सेवा अपुरी असताना, फार्मासिस्ट हा उपचाराचा महत्त्वाचा दुवा ठरतो. लोकांचा विश्वास हाच खरा सन्मान आहे,” असे भावनिक उद्गार त्यांनी काढले.
कार्यक्रमाला प्रमुख पाहुणे म्हणून रत्नागिरी व सिंधुदुर्गचे सहाय्यक आयुक्त (अन्न व औषध प्रशासन) शशिकांत यादव उपस्थित होते. त्यांनी विद्यार्थ्यांना आवाहन करताना सांगितले, “औषध हे जीवन वाचवणारा घटक आहे, त्यामुळे फार्मासिस्टने कोणताही शॉर्टकट न वापरता प्रामाणिकपणे उच्च शिक्षण घेऊन या क्षेत्रात तज्ज्ञ होणे गरजेचे आहे.” त्यांनी भारतीय औषध उद्योग, देशातील वैद्यकीय व्यवस्था आणि फार्मासिस्ट समुदायाच्या जबाबदारीवर विस्तृत भाष्य केले.
कॉलेजचे कार्याध्यक्ष अच्युत सावंत-भोसले यांनी ‘फार्मासिस्ट ऑफ द इयर’ पुरस्कारामागील संस्थेचा विचार स्पष्ट केला. “आदर्श फार्मासिस्ट कसा असावा याची विद्यार्थ्यांना जाणीव व्हावी आणि अशा आदर्श व्यक्तींचे गुण त्यांनी अंगीकारावेत यासाठीच हा पुरस्कार सुरू करण्यात आला. कुळकर्णी यांच्यासारख्या ज्येष्ठ फार्मासिस्टकडून प्रेरणा घेऊन आमचे विद्यार्थीही जबाबदार व आदर्श फार्मासिस्ट बनतील,” अशी अपेक्षा त्यांनी व्यक्त केली. यावेळी आनंद रासम यांनी विचार मांडले.
भारतीय औषध उद्योगावर माहिती
कार्यक्रमाच्या सुरुवातीला डी. फार्मसीचे प्राचार्य डॉ. सत्यजित साठे यांनी भारतीय औषध उद्योगाची सुरुवात, विस्तार आणि भारताचे जागतिक औषधनिर्मिती क्षेत्रातील योगदान यावर माहिती दिली. “आज भारत हा जगातील आघाडीचा औषध निर्यातदार आणि व्हॅक्सीन उत्पादनात अग्रस्थानी असलेला देश आहे,” असे ते म्हणाले. प्राचार्य डॉ. विजय जगताप यांनी प्रास्ताविक केले.
यावेळी संस्थेच्या अध्यक्षा अँड. अस्मिता सावंतभोसले, श्रीपाद कुळकर्णी यांच्या पत्नी व नात, प्रशासकीय अधिकारी सुनेत्रा फाटक, विनायक दळवी, संतोष राणे, अमर गावडे, सचिन बागवे, प्रसाद सप्ते, ग्रेगरी डान्टस आदी फार्मासिस्ट उपस्थित होते. कार्यक्रमाचे नियोजन प्रा. अंकिता नेवगी व डॉ. प्रशांत माळी यांनी केले तर सूत्रसंचालन प्रा. गौरी भिवशेठ यांनी केले.