काही दिवसांपूर्वी स्वप्निल जोशी आणि प्रसिद्ध नृत्य दिग्दर्शक गणेश आचार्य यांचे एकत्र फोटो व्हायरल झाले होते. त्यामुळे हे दोघे नक्की काय करणार आहेत याचा विचार त्यांचे चाहते करत होते. पण आता गणेश आचार्य मराठी सिनेसृष्टीत दिग्दर्शक म्हणून पदार्पण करत आहे. ‘स्वामी तिन्ही जगाचा: भिकारी’ असे त्यांच्या मराठी सिनेमाचे नाव आहे. गणेश आचार्य याने याआधी काही हिंदी सिनेमांचे दिग्दर्शन केले होते. पण मराठीत सिनेमा दिग्दर्शन करण्याची तशी त्याचीही पहिलीच वेळ.
अनेक वर्षांपासून मित्र असलेले गणेश आचार्य आणि शरद देवराम शेलार यांनी मी मराठा फिल्म प्रोडक्शनची स्थापना केली. याच प्रोडक्शनकडून या सिनेमाची निर्मिती केली जाणार आहे. ‘स्वामी तिन्ही जगाचा: भिकारी’ हा सिनेमा मोठ्या व्यावसायिक कुटुंबातील आई आणि मुलाच्या हळव्या नात्यावर भाष्य करणारा असेल असे गणेश आचार्यने सांगितले. तर या सिनेमात अभिनेता स्वप्नील जोशी, रुचा इनामदार, गुरू ठाकूर, सयाजी शिंदे, मिलिंद शिंदे, कीर्ती आडारकर, सुनील पाल आणि प्रदीप काब्रा अशी तगडी स्टारकास्ट पाहायला मिळणार आहे.
‘गेल्या काही वर्षांत मराठी सिनेमाने स्वत:चा ठसा उमटवला आहे. उत्तम आशय आणि व्यावसायिक यश या दोन्हीचा मिलाफ मराठी सिनेमांत होत आहे. मराठीत काम करताना सकस आशय ही मराठी सिनेमांची ताकद असल्याचे लक्षात आले. त्यामुळे मला स्वत:ला बरीच वर्षे मराठी सिनेमा दिग्दर्शित करायचा होता. ती इच्छा या सिनेमाच्या निमित्ताने पूर्ण होत आहे. वेगळे कथानक आणि उत्तम स्टारकास्ट हे सिनेमाचे वैशिष्ट्ये आहे. हा सिनेमा मराठी रसिकांना नक्कीच आवडेल अशी मला आशा आहे,’ असे गणेश आचार्य याने सांगितले. अमिताभ बच्चन, टायगर श्रॉफ यांच्या उपस्थितीत या सिनेमाचा मुहुर्त करण्यात आला. यावेळी बिग बी आणि टायगर श्रॉफ यांनी गणेश आचार्य याला सिनेमासाठी शुभेच्छा दिल्या.
‘चिकनी चमेली’सारखे नृत्यदिग्दर्शन केलेली गणेश आचार्य याची गाणी प्रचंड गाजली आहेत. याशिवाय स्वामी (२००७) , मनी है तो हनी है (२००८) आणि एन्जल (२०११) या हिंदी सिनेमांचे दिग्दर्शनही त्याने केले आहे. अलीकडे मराठी सिनेमातील गाजलेल्या ‘आला होळीचा सण लय भारी’, ‘तुझी चिमणी उडाली भूर्रर्र’, ‘डॅशिंग गोविंदा’ अशा गाण्यांचे नृत्यदिग्दर्शन त्याने केले आहे.