मुंबई : राज्यातील लहान मुलांच्या सुरक्षिततेसाठी प्रत्येक खासगी शाळेत जूनपासून सीसीटीव्ही बसविणे सक्तीचे करण्यात आले असून स्थानिक स्वराज्य संस्थांच्या शाळांमध्ये वर्षभरात लावण्यात येतील, अशी घोषणा शालेय शिक्षणमंत्री वर्षां गायकवाड यांनी शुक्रवारी विधान परिषदेत केली. प्रत्येक शाळेत सखी सावित्री समित्या स्थापन केल्या जातील आणि त्या माध्यमातून मुलांना लैंगिक किंवा अन्य त्रास होऊ नये, यासाठी आवश्यक दक्षता व उपाययोजना केल्या जातील. पुण्यात २३ मार्च २०२२ रोजी शालेय विद्यार्थिनीबाबत घडलेल्या घटनेच्या पार्श्वभूमीवर गायकवाड यांनी सभागृहात निवेदन दिले. शालेय विद्यार्थ्यांच्या सुरक्षिततेच्या दृष्टीने उपसभापती डॉ. नीलम गोऱ्हे यांनी शिक्षण विभागाला निर्देश दिले होते. त्यानंतर वरिष्ठ पोलीस अधिकारी आणि शिक्षण विभागाच्या बैठका होऊन झालेल्या निर्णयांबाबत गायकवाड यांनी निवेदन केले. या समितीमध्ये शिक्षक, पालक, शाळा व्यवस्थापन व दोन मुलगे व मुली यांचा समावेश राहील.