Lalbaug Accident : लालबागच्या अपघातामुळे एक प्रेमकहाणी अधुरी राहिली, नुपूर मणियारच्या मृत्यूमुळे प्रियकर एकाकी

नेमकी काय घटना घडली?

२८ वर्षीय नुपूर मणियारचा या भीषण अपघातात मृत्यू झाला. नुपूरच्या मृत्यूसाठी बेस्ट बसमधला मद्यधुंद प्रवासी कारण ठरला. बस अनियंत्रित होण्यासाठी हाच प्रवासी जबाबदार होता. बेस्टची ६६ क्रमांकाची बस बॅलार्ड पिअर या ठिकाणाहून राणी लक्ष्मीबाई चौक सायनच्या दिशेने जात होती. बस लालबागच्या गणेश टॉकिजजवळ आली त्यावेळी मद्यधुंद प्रवासी आणि चालक यांच्यात वाद झाला. वाद घालणाऱ्या प्रवाशाने बेस्ट बसचं स्टिअरिंग खेचलं. त्यामुळे चालकाचा बसवरचा ताबा सुटला आणि बसने ९ जणांना उडवलं. या घटनेत नुपूर मणियारने नाहक जीव गमावला.

नुपूरसह तिचा होणारा नवराही अपघातात जखमी

करोना काळात नुपूर मणियारच्या वडिलांचं निधन जालं. त्यानंतर अनुकंपा तत्त्वावर नुपूरला आयकर खात्यात दोन महिन्यांपूर्वीच नोकरी मिळाली होती. आपल्या आईला आणि बहिणीला नुपूर सांभाळत होती. मात्र आता अधुरी स्वप्नं, अधुरी प्रेमकहाणी ठेवून नुपूरने जगाचा निरोप घेतला आहे. लालबागमध्ये जो अपघात झाला त्या दिवशी नुपूर तिच्या होणाऱ्या नवऱ्यासह खरेदीला आली होती. मद्यधुंद दत्ता शिंदेच्या वर्तनाने नुपूरला जीव गमावावा लागला. जोडीदाराबरोबर प्रेमविवाह करण्याचं तिचं स्वप्न स्वप्नच राहिलं. एक प्रेमकहाणी अधुरी राहिली. या अपघातात तिचा प्रियकरही जखमी झाला. मात्र उपचारांच्या वेळी नुपूरने अखेरचा श्वास घेतला आणि सगळी स्वप्नं मागे ठेवून ती निघून गेली.

मद्यधुंद दत्ता शिंदेमुळे निष्पाप नुपूरने जीव गमावला

मद्यधुंद अवस्थेत असलेला दत्ता शिंदे हा चालकाशी वाद घालत होता. गणेश उत्सवापूर्वीचा रविवार असल्याने लालबाग परिसरात चांगलीच गजबज आणि गर्दी होती. ६६ क्रमांकाची बस जेव्हा गणेश टॉकिजजवळ आली तेव्हा दत्ता शिंदेने स्टिअरिंग फिरवलं. ड्रायव्हरच्या हाताला हिसका दिला, पाठीत बुक्का मारला. यामुळे चालकाचं नियंत्रण सुटलं आणि अपघात झाला. या अपघातात नुपूर मणियार या तरुणीला जीव गमवावा लागला. नुपूर मणियार ही मणियार कुटुंबातली कर्ती मुलगी होती. तिचं लग्न ठरलं होतं, प्रियकरासह सुखी संसाराची स्वप्नं ती बघत होती. पण दत्ता शिंदे नावाच्या मद्यधुंद माणसामुळे तिचा अपघाती मृत्यू झाला आणि तिची स्वप्नं, तिची प्रेमकहाणी सगळंच अधुरं राहिलं.