मुंबई : बेस्टच्या कर्मचाऱ्यांना रोखीने पगार देण्याचे प्रमाण दिवसेंदिवस वाढत चालले आहे. ऑक्टोबर महिन्याच्या पगारापैकी १६ हजार रुपये सुटय़ा नोटांच्या व नाण्यांच्या स्वरूपात देण्यात आले आहेत. त्यात एक हजार रुपयांची नाणी देण्यात आली आहेत.
तिकिटाच्या रकमेतून येणारी पाच, दहा रुपयांची नाणी आणि विजेच्या बिलांच्या रकमेतून येणाऱ्या सुटय़ा नोटांचा खच बेस्टकडे पडला आहे. सुटय़ा पैशांचा प्रश्न अद्याप सुटलेला नसल्यामुळे कर्मचाऱ्यांना पगारातून ही रोख रक्कम देण्याची पद्धत बेस्टने वर्ष-दीड वर्षांपूर्वी सुरू केली. सुरुवातीला केवळ एक हजाराची नाणी दिली जात होती. त्यानंतर ही रक्कम वाढवत नेत मार्चमध्ये कर्मचाऱ्यांना पगारातील ११ हजार रुपये रोखीने दिले होते, तर ऑक्टोबरमध्ये तब्बल १६ हजार रुपये रोख पगार देण्यात आले आहेत, तर उर्वरित पगार किंवा मूळ वेतनाइतका पगार बँकेत जमा केला जातो.
अनेक कर्मचाऱ्यांचे कर्जाचे हप्ते बँकेतून जात असतात, परंतु जास्तीत जास्त पगार रोखीने मिळू लागल्यामुळे व बँकेत पगार कमी जमा होत असल्यामुळे पगार आल्यानंतर तो कर्मचाऱ्यांना बँकेत जमा करावा लागतो, तर अनेक कर्मचाऱ्यांना बँकेत कमी पगार असल्यामुळे नव्याने कर्ज मिळणे मुश्कील झाले असल्याची प्रतिक्रिया कर्मचाऱ्यांनी दिली.