मुंबई : ‘रीटा वेलिणकर’, ‘त्या वर्षी’, ‘निर्मला पाटीलचे आत्मकथन’ अशा आत्मनिर्भर जगण्याचं भान देणाऱ्या स्वतंत्र कादंबऱ्या, ‘द वे होम’, ‘वन फूट इन द ग्राउंड’ हे इंग्रजीतील लेखन, तसेच चिं. त्र्यं. खानोलकरांचे ‘अवध्य’, तसेच ‘श्यामची आई’, ‘स्मृतिचित्रे’ , ‘सखाराम बाईंडर’ ,‘बेगम बर्वे’आदी दर्जेदार साहित्यकृतींचा इंग्रजी अनुवाद अमराठी वाचकांपर्यंत पोहोचवून मराठी आणि इंग्रजी साहित्यविश्वात स्वतःचं भक्कम स्थान निर्माण करणाऱ्या मराठी-इंग्रजी अनुवादक, चित्रपट-कला समीक्षक, पत्रकार आणि ज्येष्ठ लेखिका शांता गोखले यांना यंदाचा ‘लोकसत्ता दुर्गा जीवनगौरव पुरस्कार’ प्रदान केला जाणार आहे.
येत्या मंगळवारी ७ ऑक्टोबर रोजी दादर येथील ‘श्री शिवाजी मंदिर’ नाट्यगृहात सायंकाळी ६.१५ वाजता होणाऱ्या सोहळ्यात ‘लोकसत्ता दुर्गा पुरस्कार २०२५’ साठी निवड करण्यात आलेल्या नऊ दुर्गांना सन्मानित करण्यात येणार आहे. या वेळी ज्येष्ठ सामाजिक कार्यकर्त्या मेधा पाटकर प्रमुख पाहुण्या म्हणून उपस्थित राहणार आहेत. पुरस्कार सन्मान सोहळा सर्वांसाठी खुला असणार आहे. एका व्यक्तीस एकच प्रवेशिका दिली जाणार असून नाट्यगृहात कार्यक्रमापूर्वी अर्धा तास आधी वितरित केल्या जातील. कार्यक्रमास प्रथम येणाऱ्यास प्रथम प्रवेश मिळेल. काही जागा राखीव असतील.
निवड झालेल्या यंदाच्या दुर्गा
- सूक्ष्म जैवतंत्रज्ञानातून शाश्वत विकास घडवणाऱ्या वैज्ञानिक डॉ. आरोही कुलकर्णी.
- ‘अप्लाइड एन्व्हायरन्मेंटल रिसर्च फाउंडेशन’ची स्थापना करून देवराया, आणि हजारो एकर खासगी जंगलांचे संरक्षण करणाऱ्या डॉ. अर्चना गोडबोले.
- मोहरी आणि जवस पिकावर संशोधन करून शेतकऱ्यांचे कृषी उत्पन्न वाढवणाऱ्या डॉ. बीना नायर.
- नक्षलग्रस्त भामरागड तालुक्यातील कोठी ग्रामपंचायतीतील गावांना विकासाच्या वाटेवर नेणाऱ्या युवा सरपंच भाग्यश्री लेखामी.
- ग्रामीण महाराष्ट्रातील सुमारे १८ लाख स्त्रियांना ‘माविम’च्या माध्यमातून आर्थिकदृष्ट्या सक्षम करणाऱ्या कुसुम बाळसराफ.
- भारताच्या अणुऊर्जा कार्यक्रमासाठी ‘रेडिओ फ्रिक्वेन्सी’, ‘सॉलिड स्टेट पॉवर ॲम्प्लिफायर’ तंत्रज्ञान विकसित करणाऱ्या शास्त्रज्ञ डॉ. मंजिरी पांडे.
- लोकांच्या सहभागातून ७५ हून जास्त तलावांचे पुनरुज्जीवन आणि ५९ स्थानिक माशांच्या जातींचे संरक्षण आणि संवर्धन करणाऱ्या शालू कोल्हे.
- कोकण किनारपट्टीवरील ‘सी स्पंज’ या जलचर प्राण्यांवर संशोधन करून त्यांच्या १९ प्रजाती शोधणाऱ्या, ‘फिशिंग प्रेशर’चा अभ्यास करून मत्स्य उत्पादन वाढवण्यास हातभार लावणाऱ्या डॉ. स्वप्नजा मोहिते.
- ‘निर्माण’ संस्थेच्या माध्यमातून १५ हजार भटक्या-विमुक्त वर्गातील मुलांना शिक्षणाची संधी उपलब्ध करून देणाऱ्या वैशाली भांडवलकर.
स्त्री कलाकारांचा वाद्यवृंदीय आविष्कार
सन्मान सोहळ्यावेळी स्त्री कलाकारांचे वाद्यवृंदीय सादरीकरण हे खास आकर्षण असणारआहे. या कार्यक्रमात भावना अंकुश, अमृता ठाकूरदेसाई, फेणी भावसार, राधिका अंतुरकर, प्रेषिता मोरे, विनिता जाधव, सुलक्षणा फाटक, शलाका देशपांडे, कौशिकी जोगळेकर या कलाकारांचा सहभाग असणार आहे. कार्यक्रमाचे सूत्रसंचालन डॉ. श्वेता पेंडसे आणि कुणाल रेगे करणार असून संयोजन ‘आर्च एंटरप्राइजेस’ यांचे आहे.