“माझ्या नावाशी खेळायला…” जॅकी श्रॉफ यांना ‘जॅकी’ हे नाव का पडले? जाणून घ्या नावामागची खरी कहाणी

बॉलिवूड अभिनेता जॅकी श्रॉफ यांचा आज ६५ वा वाढदिवस आहे. जॅकी श्रॉफ यांना ९० च्या दशकातील लोकप्रिय अभिनेते म्हणून ओळखले जाते. त्यांनी सुभाष घई यांच्या ‘हिरो’ चित्रपटातून बॉलिवूडमधून पदार्पण केलं होतं. जॅकी यांनी अलीकडेच एक मुलाखत दिली. यात त्यांनी त्यांचा जयकिशन श्रॉफचे जॅकी श्रॉफ याचा प्रवास उलगडला. जॅकी याचं मुळ नाव जयकिशन श्रॉफ होतं. त्यांना त्यांचे चाहते प्रेमाने जग्गुदादा म्हणतात. या मुलाखतीत बोलताना त्यांनी ते जयकिशन श्रॉफचे जॅकी श्रॉफ कसे बनले, याबाबतही खुलासा केला. जॅकी श्रॉफ यांचा जन्म मुंबईच्या चाळीत झाला होता. त्यांचं तरुणपणही तिथेच गेलं. त्यांचा चाळीपासूनचा ते बॉलिवूड सुपरस्टार होण्यापर्यंतचा प्रवास अनेकांसाठी प्रेरणादायी आहे. ‘बॉलिवूड हंगामा’ला दिलेल्या मुलाखतीत जॅकी श्रॉफ म्हणाले, "माझी आई मला जग्गू म्हणायची आणि माझे वडील मला जयकिशन म्हणायचे." "माझे मित्र मला जग्गू बाबा म्हणायचे." "तर काही जण मला जय म्हणायचे, तर काही किशन म्हणून हाक मारायचे." "माझी खूप नावं आहेत, तुम्ही मला कोणत्याही नावाने हाक मारा, पण प्रेमाने हाक मारा इतकंच." "मी शाळेत असताना माझा एक मित्र होता. तो हाँगकाँग की दुबईहून आला होता." "त्याला माझं जयकिशन नाव खूप मोठं वाटत होतं." "त्यामुळे माझ्या नावाशी थोडं खेळायला हवं असं त्याला वाटलं." "त्याने मला जय-की या नावाने हाक मारायला सुरुवात केली." "यानंतर ते जय-कीचं जॅकी झालं." "माझी नावं बदलत राहतात. पण मी मात्र अजूनही तोच आहे." दरम्यान, जॅकी श्रॉफ शेवटचे कतरिना कैफ, इशान खट्टर आणि सिद्धांत चतुर्वेदी यांच्याबरोबर ‘फोन भूत’ चित्रपटात दिसले होते. काही दिवसांपूर्वी ते ‘लाईफ्स गूड’ या चित्रपटात झळकले.