अंडी फ्रिजमध्ये ठेवण्याची सवय चुकीची तर नाही ना? जाणून घ्या तज्ज्ञांचं मत…

'टाइम्स ऑफ इंडिया' वृत्तानुसार २०२१ च्या एका अभ्यासानुसार, अंडी २५°C तापमानावर काही दिवस ठेवली असता, सॅल्मोनेला टायफिम्युरियम या जंतूंची वाढ झपाट्याने होते; पण तीच अंडी रेफ्रिजरेटरमध्ये ठेवली, तर त्यांची वाढ खूप कमी होते. अमेरिकेसारख्या देशांत अंडी विक्रीपूर्वी धुतली आणि निर्जंतुक केली जातात. त्यामुळे त्यांचे नैसर्गिक संरक्षक थर निघून जातात. म्हणूनच तिथे अंडी थंड जागी ठेवणे आवश्यक असते. USDA (अमेरिकेचा कृषी विभाग) सुचवतो की, अंडी ४°C किंवा त्याखालील तापमानावर ठेवावीत आणि फ्रिजमधून बाहेर काढल्यावर दोन तासांपेक्षा जास्त वेळ खोलीच्या तापमानात ठेवू नयेत. युरोप आणि आशियातील अनेक देशांत अंडी धुतली जात नाहीत. त्यामुळे त्यांच्या कवचावरील नैसर्गिक थर (cuticle) टिकून राहतो आणि त्यामुळे तिथे अंडी थंड जागी ठेवण्याची तितकीशी आवश्यकता नसते. भारतासारख्या उष्ण हवामानाच्या देशांत उष्ण तापमानामुळे अंडी लवकर खराब होऊ शकतात. म्हणून रेफ्रिजरेशन केल्यास ती जास्त काळ ताजी आणि सुरक्षित राहतात. फ्रिजमधून वारंवार अंडी बाहेर काढल्यास, त्यावर ओलसरपणा (condensation) तयार होतो आणि या ओलसर थरात जंतू वाढण्याची शक्यता वाढते. जर तुम्ही सुपर मार्केटमधून घेतलेली अंडी आधीच थंड जागी ठेवलेली असतील, तर ती पुढेही फ्रिजमध्येच ठेवा. अंडी मूळ कार्टनमध्ये ठेवावीत आणि फ्रिजच्या दरवाजात न ठेवता, आतील शेल्फवर ठेवावीत. कारण- दरवाजा उघडताना तापमान बदलत राहते. स्थानिक शेतीतून आलेली न धुतलेली अंडी हवामान थंड असेल तर काही दिवस खोलीच्या तापमानावरही ठेवता येतात साधारण एक आठवड्यापर्यंत ती ताजी राहतात. लोकप्रिय समजुतीप्रमाणे, अंडी थंड जागी ठेवल्याने त्यांची चव किंवा पौष्टिकता कमी होत नाही. उलट, रेफ्रिजरेशनमुळे अंड्यांचा ताजेपणा आणि सुरक्षितता जास्त काळ टिकून राहते. (टीप : येथे देण्यात आलेली माहिती गृहीतके आणि सामान्य माहितीवर आधारित आहे. अधिक महितीकरिता तज्ञांचा सल्ला घ्यावा.) (सर्व फोटो सौजन्य : फ्रीपिक/पेक्सल्स )