PHOTOS : जणूकाही साक्षात ‘देव लोक’ नगरीच ‘भू लोक’वर अवतरली

मध्य प्रदेशातील उज्जैनमध्ये भगवान महाकालची प्रार्थना केल्यानंतर पंतप्रधान मोदींनी आज (मंगळवार) वैदिक मंत्रोच्चारात "श्री महाकाल लोक"चे लोकार्पण केले. हे अद्भूत संकुल बांधण्यासाठी मध्य प्रदेश सरकार ४२१ कोटी रुपयांचे योगदान देणार आहे. केंद्र सरकारकडून २७१ कोटी रुपये दिले जाणार आहे. तर २१ कोटी रुपयांचा खर्च मंदिर समिती उचलणार आहे. या कार्यक्रमासाठी पंतप्रधान मोदी आज संध्याकाळीच उज्जैनला पोहोचले होते. महाकाल संकुल २० हेक्टरमध्ये बांधण्यात येत आहे. उत्तर प्रदेशातील वाराणसी येथील काशी विश्वनाथ कॉरिडॉरपेक्षा हे चौपट मोठे आहे. पौराणिक रुद्रसागर तलावाच्या काठावर महाकाल कॉरिडॉर विकसित करण्यात आला आहे. भगवान शिव, देवी सती आणि इतर धार्मिक कथांशी संबंधित सुमारे २०० शिल्पे आणि भित्तिचित्रे येथे कोरलेली आहेत. येथे सप्त ऋषींच्या भव्य आणि विशाल मूर्ती, नवग्रह मंडळ, त्रिपुरासुर वध, १०८ स्तंभात भगवान शिवाचे आनंद तांडव, शिवस्तंभ, प्रवेशद्वारावर विराजमान केलेले नंदी आहेत. महाकाल लोक प्रकल्पाचा पहिला टप्पा यात्रेकरूंना जागतिक दर्जाच्या आधुनिक सुविधा उपलब्ध करून देणार आहे. यामुळे यात्रेकरुंचा मंदिर पाहण्याचा अनुभव अधिक समृद्ध होण्यास मदत होईल. या प्रकल्पाचा उद्देश संपूर्ण वारसा वास्तूंचे संवर्धन आणि जीर्णोद्धार यावर विशेष भर देणे आहे. या प्रकल्पाअंतर्गत मंदिर परिसराचा सातपट विस्तार करण्यात येणार आहे. विशेष म्हणजे यामुळे राज्यातील आणि विशेषतः उज्जैनमधील पर्यटनाला चालना मिळणार आहे. उज्जैनमध्ये दरवर्षी लाखो लोक महाकालच्या दर्शनासाठी येतात. या संपूर्ण प्रकल्पाची एकूण किंमत सुमारे ८५० कोटी रुपये आहे. कॉरिडॉरचे उद्घाटन करण्यापूर्वी मोदींनी महाकालमध्ये भगवान शिवाची पूजा केली. सायंकाळी सहाच्या सुमारास मोदी मंदिराच्या गर्भगृहात गेले. त्यांनी पारंपारिक धोतर परिधान केले होते आणि गमछा घातला होता. मध्य प्रदेशचे मुख्यमंत्री शिवराज सिंह चौहान आणि केंद्रीय मंत्री ज्योतिरादित्य सिंधिया हेही पंतप्रधान मोदींसोबत होते. “शंकराच्या सहवासात काही सामान्य नाही. सर्व काही अलौकिक, विलक्षण आहे. अविस्मरणीय, अविश्वसनीय.” असं मोदींनी म्हटलं आहे. जिथे महाकाल आहे, तिथे कालखंडाच्या सीमा नाहीत.असंही मोदी म्हणतात. महाकालाच्या आशीर्वादाने भारताची भव्यता संपूर्ण जगाच्या विकासाच्या नव्या शक्यतांना जन्म देईल - पंतप्रधान मोदी