Photos: वाढलेली दाढी, डोक्यावर केशरी पगडी, अन्… राहुल गांधी सुवर्ण मंदिरात झाले नतमस्तक

राहुल गांधींच्या नेतृत्त्वात निघालेली काँग्रेसची भारत जोडो यात्रा उत्तर भारतात पोहचली आहे. या यात्रेवरून सत्ताधारी पक्षाने कॉंग्रेस आणि राहुल गांधी यांच्यावर अनेक गोष्टींवरून टीका केली असली तरी अनेकांनी यावेळी राहुल गांधी यांच्या तंदुरुस्तीचे आणि चिकटीचे कौतुकही केले आहे. या भारत जोडो यात्रेला राम मंदिराचे पुजारी महंत सत्येंद्र दास यांनी शुभेच्छा दिल्या आहेत. तसंच राहुल गांधी यांना त्यांनी एक पत्र लिहून आशीर्वादही दिले. तसेच महंत जन्मजेय यांनीही राहुल गांधी यांच्या भारत जोडो यात्रेला शुभेच्छा दिल्या आहेत. महंत जन्मेजय हे जानकी घाटाचे पुजारी आहेत. भारतमातेवर प्रेम करणाऱ्या प्रत्येकाला राहुल गांधी यांची भारत जोडो यात्रा आवडणारच, असं त्यांनी म्हटलं आहे. 'भारत जोडो' यात्रेदरम्यान राहुल गांधी यांनी पंजाब येथील यात्रा सुरू करण्याच्या एक दिवस आधी आज मंगळवारी अमृतसर येथील सुवर्ण मंदिरात जाऊन दर्शन घेतले. यावेळी ते सुवर्ण मंदिरात जाऊन नतमस्तक झाले. मंगळवार १० जानेवारीला 'भारत जोडो' यात्रेचा हरियाणा दौरा अंबाला येथे पूर्ण झाला. पक्षाचे महासचिव जयराम रमेश यांनी सांगितले की राहुल गांधी अमृतसर येथे काही तास थांबून सायंकाळी फतेहगड साहिब येथे पोहोचतील. याआधी, राहुल गांधी यांनी मंगळवारी सकाळी अंबाला कॅन्टमधील शाहपूर येथून पदयात्रेला सुरुवात झाली. यादरम्यान, माजी खासदार आणि काँग्रेस नेते राज बब्बरही या यात्रेत सहभागी झाले होते. गुरुवारी ही यात्रा उत्तर प्रदेशातून पानिपतमार्गे हरियाणात दाखल झाली. पानिपत, कर्नाल, कुरुक्षेत्र मार्गे अंबाला येथे पोहोचले. गेल्या २१ ते २३ डिसेंबर दरम्यान ही यात्रा मेवात, फरिदाबाद आणि हरियाणातील इतर काही भागातून गेली. ही यात्रा बुधवारी मंडी गोविंदगडमार्गे जाणार असून खन्ना येथे रात्रीचा मुक्काम असेल. काँग्रेसचे सरचिटणीस म्हणाले की, यात्रेअंतर्गत दररोज दोन टप्प्यात सुमारे २५ किलोमीटरचे अंतर पार केले जाईल. (Twitter: @INCIndia)