Photo : गाडीचं स्मारक, पुणेरी निषेध आणि वाहतूक पोलीस…पुणेकराची धम्माल शक्कल!

1/20

पुण्याचं सगळंच हटके असतं, असं नेहमी म्हटलं जातं. पुणेरी पाट्या हा देखील तितकाच चर्चेचा विषय असतो.

2/20

याच पाट्यांचा वापर करून एका पुणेकरानं चक्क त्याच्या दुचाकीचं स्मारक उभारलं आहे.

3/20

चूक नसताना देखील आपली बाईक वाहतूक विभागानं उचलून नेली, याचा निषेध करण्यासाठी त्यानं ही शक्कल लढवली.

4/20

गणेशोत्सवाचं निमित्त साधून पुण्याच्या कोथरूडमझील सचिन धनकुडे यांनी चक्क त्यांच्या बाईकचंच स्मारक देखावा म्हणून उभं केलं.

5/20

१५ जूनला सचिन धनकुडे यांची बाईक वाहतूक विभागाच्या गाडीनं उचलून नेली होती. पण गाडी नो पार्किंगमध्ये नसल्याचा सचिन धनकुडे यांचा दावा आहे.

6/20

आपली चूक नसतानाही गाडी उचलून नेल्याचं लक्षात येताच सचिन धनकुडे यांनी वाहतूक विभागाच्या कार्यालयात अनेकदा हेलपाटे मारले. पण त्याचा काहीही उपयोग झाला नाही.

7/20

वाहतूक पोलिसांनी त्यांच्या तक्रारी किंवा आक्षेपांकडे दुर्लक्ष केल्यामुळे अखेर त्यांच्यासमोर पर्याय उरला नाही.

8/20

गणेशोत्सवाच्या पार्श्वभूमीवर त्यांनी कोथरूडमधल्या भुसारी कॉलनी गणेश मंडळामध्ये गाडीचं स्मारक हा देखावाच उभा केला.

9/20

यामध्ये स्मारकाच्या सगळ्यात वरच्या बाजूला त्यांनी दुचाकी ठेवली आहे.

10/20

स्मारकाच्याच एका बाजूला गणेश मूर्तीची स्थापना करण्यात आली आहे.

11/20

स्मारकावर अनेक पाट्या लावल्या असून त्यावर तिरकस पद्धतीने वेगवेगळे संदेश लिहिण्यात आले आहेत.

12/20

यामध्ये वाहतुकीच्या अनेक समस्यांचा उल्लेख करण्यात आला आहे.

13/20

त्यासोबतच जनजागृती करण्यासाठी देखील काही मुद्दे नमूद केले आहेत.

14/20

माँ ने कहा शराब छोड दो, बाबुजीने कहा घर छोड दो, पीछे बैठी पारू कह रही है सिग्नल तोड दो! अशा स्टाईलमध्ये एक पाटी लिहिली आहे.

15/20

तर एका पाटीवर पोलीस कर्मचाऱ्यांना पावत्या करण्याचं टार्गेट देणं बंद करा असं आवाहन करण्यात आलं आहे.

16/20

एका पाटीवर तर चक्क लाल रंग बघून बैल उधळतात, त्यामुळे लाल सिग्नल बघितल्यावर काय करायचं, ते तुमचं तुम्ही ठरवा अशा शब्दांत सिग्नल तोडणाऱ्यांना चांगलंच बोधामृत देण्यात आलं आहे.

17/20

सचिन धनकुडे यांच्या या गाडीच्या स्मारकाची कोथरूड परिसरात चांगलीच चर्चा रंगली आहे.

18/20

सचिन धनकुडे यांच्या या ‘गाडीचं स्मारक निषेधा’नंतर पोलिसांन तब्बल ८० दिवसांनी त्यांची गाडी परत केली आहे.

19/20

दरम्यान, आपण कोणतीही चूक केली नसल्यामुळे पोलिसांनी कसलाही दंड न घेताच आपली दुचाकी परत केल्याचं त्यांनी सांगितलं.

20/20

या देखाव्यातून पुणे शहरातील पार्किंग आणि फुटपाथचं ऑडिट करण्याची मागणी त्यांनी केली आहे.