अकलूजला जाऊन ‘आर्ची’ला  पाहण्यासाठी पैसे नाहीत म्हणून घरफोडी

वाकड पोलिसांनी एक सराईत व एका अल्पवयीन आरोपीला या प्रकरणात अटक केली आहे. काळेवाडी परिसरात राहणाऱ्या या आरोपींनी परिसरात घरफोडी केली. दोन दुचाकी वाहनांची चोरीही केली. घरफोडीत त्यांना ५० हजार रुपये मिळाले. या घरफोडीविषयी व आरोपींविषयी माहिती मिळाल्यानंतर पोलिसांनी सापळा रचून दोन्ही आरोपींना अटक केली. त्यानंतर, पोलिसांना कबुली देताना अल्पवयीन आरोपीचे कथन ऐकून पोलीसही चक्रावून गेले. मी सैराट अनेकदा पाहिला. मला ‘आर्ची’ आवडते. तिला पाहण्याची खूप इच्छा होती. त्यासाठी अकलूजला जायचे होते. मात्र, त्यासाठी पैसे नव्हते. त्यामुळे एका साथीदारासमवेत घरफोडी केली आणि दुचाकीवर तिकडे गेलो. एक दिवस मुक्कामही केला. शाळेत जाण्यासाठी म्हणून ‘आर्ची’ आली होती. तिला भेटता आले नाही. मात्र, समक्ष पाहिल्याचा खूप आनंद झाला. जवळच्या एका हॉटेलमध्ये तो आनंद साजरा केला. तिथेच १५ हजार रुपये खर्च झाल्याची माहिती त्याने दिल्यावर पोलीस थक्क झाले. आरोपींकडून दोन्ही दुचाकी व खर्च न झालेले २० हजार रुपये जप्त करण्यात आले आहेत. पुढील तपास वाकड पोलीस करत आहेत.