पुणे : आपल्या अलौकिक स्वरांच्या जादूने गेली सहा दशके संगीत रंगभूमीवर कार्यरत असलेल्या ज्येष्ठ गायिका-अभिनेत्री, मराठी रंगभूमी संस्थेच्या प्रमुख आणि अखिल भारतीय मराठी नाट्यसंमेलनाच्या माजी अध्यक्षा कीर्ती शिलेदार (वय ६९) यांचे शनिवारी पहाटे निधन झाले. स्वरसम्राज्ञी नाटकातील भूमिकेने त्यांनी रसिकांच्या मनावर अधिराज्य गाजविले होते. त्यांच्यामागे संगीत रंगभूमीवरील प्रसिद्ध गायिका-अभिनेत्री दीप्ती भोगले या भगिनी आहेत.  गेल्या काही दिवसांपासून कीर्ती शिलेदार यांची प्रकृती ठीक नव्हती. त्यांच्यावर खासगी रुग्णालयात डायलिसिसचे उपचार सुरू होते. शनिवारी पहाटे त्यांना धाप लागली. त्यानंतर त्यांना रुग्णालयात दाखल करण्यात आले. मात्र, उपचारादरम्यान त्यांची प्राणज्योत मालवली. कीर्ती शिलेदार यांच्या निधनाचे वृत्त समजताच विविध मान्यवरांनी  निवासस्थानी जाऊन शिलेदार यांच्या पार्थिवाचे अंत्यदर्शन घेतले. वैकुंठ स्मशानभूमीत त्यांच्या पार्थिवावर अंत्यसंस्कार करण्यात आले. संगीत रंगभूमीवरील जयराम शिलेदार आणि जयमाला शिलेदार या दांपत्याच्या दोन्ही कन्या दीप्ती आणि कीर्ती शिलेदार यांनी संगीत रंगभूमी हेच आपले कार्यक्षेत्र मानले. घरातच संगीत रंगभूमीचे बाळकडू मिळालेल्या कीर्ती यांनी संगीत रंगभूमीची ध्वजा फडकावत ठेवली. विविध २७ नाटकांतून ३४ भूमिका साकारत कीर्ती शिलेदार यांनी साडेचार हजारांहून अधिक प्रयोग केले. कीर्ती शिलेदार यांना डोळ्यासमोर ठेवूनच विद्याधर गोखले यांनी स्वरसम्राज्ञी नाटकाची निर्मिती केली होती. नाटकातील ‘मैना’ भूमिकेला कीर्ती शिलेदार यांनी न्याय दिला.

या बातमीसह सर्व प्रीमियम कंटेंट वाचण्यासाठी साइन-इन करा

संगीत रंगभूमीच्या शिलेदार

Pune News (पुणे न्यूज), Maharashtra News, Marathi News (मराठीतील बातम्या) वाचण्यासाठी डाउनलोड करा लोकसत्ताचं Marathi News App.
Web Title: Kirti shiledar passes away akp
First published on: 23-01-2022 at 00:32 IST