शशिकांत ऊर्फ नाना मुळे हे नाव अभिजात संगीताच्या क्षेत्रात सर्वश्रुत आहे, ते त्यांच्या उत्तम तबलासाथीमुळे. गेली पाच दशके देशातील सर्व दिग्गज कलावंतांबरोबर मैफलीत तबल्याची साथसंगत करणाऱ्या नानांना महाराष्ट्र शासनाचा यंदाचा पं. भीमसेन जोशी पुरस्कार जाहीर झाल्याबद्दल त्यांचे अभिनंदन. सहसा असे पुरस्कार गवयांना मिळतात. संगतकारांच्या वाटय़ाला केवळ टाळय़ा आणि रसिकांची दाद! नाना मुळे यांना हा पुरस्कार देऊन शासनाने संगतकारांचाही सन्मान केला आहे.

या बातमीसह सर्व प्रीमियम कंटेंट वाचण्यासाठी साइन-इन करा

तालवाद्यांवर प्रभुत्व मिळवण्यासाठी मोठी साधना लागते. संगतकारांना या साधनेबरोबरच संगीताचे आणि कलावंताच्या प्रतिभेचेही भान असावे लागते. नाना मुळे यांच्याकडे ते आहे, म्हणूनच तर सगळे बिनीचे कलावंत त्यांनाच साथीला बसण्यासाठी आग्रही असत. वयपरत्वे आता मैफलीत त्यांचे दर्शन होत नाही, हे खरे; परंतु त्यांच्या व्यक्तिमत्त्वातील टवटवीतपणाला मात्र खळ पडलेली नाही. पं. भीमसेन जोशी यांच्यासारख्या कलावंताबरोबर भारतभर दौरे करत संगत करण्याची संधी त्यांना मिळाली. भारतातील सर्व कलावंत त्यांच्या प्रेमात पडले, याचे कारण त्यांच्या वादनातील शीतलता आणि समज. गाण्यात तबलावादकाने गायकाला हरवायचे नसते, की आपलीच कला जोमाने मांडायची नसते. गाण्याला समांतर जात कलावंताला संगत करणे हेही एक कसब असते. नानांकडे ते आहे.

मराठीतील सर्व स्तंभ बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.
Web Title: Loksatta vyaktivedh shashikanth muleis well known in the field of classical music amy
First published on: 09-02-2024 at 03:32 IST