श्रावणमासी.. फुले फुलली चोहीकडे!

श्रावण महिन्यात वसईतील डोंगरदऱ्या, समुद्रकिनारे हिरवेगार दिसू लागले आहेत. त्यासोबतच वसईकरांना विविधरंगी, आकर्षक फुलांचेही दर्शन होत आहे. ठिकठिकाणी फुललेल्या रंगबेरंगी फुलांमुळे वसईचा परिसर आल्हाददायक बनला आहे.

* अनेक प्रकारची काही सुवासिक तर काही गंध नसलेली फुले वसईत पाहायला मिळत आहेत. या फुलांमध्ये तेरडा, अनंत, लिली, सोनटक्का, गंधारी, अग्निशिखा, जय, कुडा, लाल तेरडा, कर्णफुले, घारेणीची फुले यांसारख्या प्रकारच्या फुलांचा समावेश आहे.

* वसईतील ग्रामीण भाग, निर्मळ, भुईगाव, सुरुची बाग, नायगाव, उमेळा, गिरिज, बोळिंज, आगाशी या परिसरात ही फुले मोठय़ा प्रमाणावर आढळून येत आहेत.

* सोनटक्का आणि ब्रह्मकमळ यांना ऐन पावसाळय़ात बहर येतो. ब्रह्मकमळे ऑगस्ट, सप्टेंबर या महिन्यातच येतात. जेवढी पानाला विस्तारायला जागा, तेवढे पानांचे फुटवे वाढतात. त्यानुसार कळ्या, फुले येण्याची शक्यता वाढते. याला उग्र वास असतो, तरीही तो आल्हाददायक असतो.

* वसईत ही रानफुले फुलल्याने अनेक छायाचित्रकार या फुलांना कॅमेराबद्ध करण्यासाठी येथे येतात.

* फुलांबरोबरच या फुलांवर भिरभिरणारे किटक व फुलपाखरे मन मोहून टाकतात. ही फुले व फुलपाखरे पाहण्यासाठी वसईतील विविध भागांत निसर्गप्रेमींनी गर्दी केली आहे.