शिक्षकांना ऑगस्टच्या वेतनात मिळणार थकीत महागाई भत्ता

जानेवारी ते एप्रिल २०१३ या चार महिन्यांचा थकीत महागाई भत्ता माध्यमिक शिक्षकांना रोखीने, ऑगस्टच्या वेतनात मिळणार असल्याची माहिती जिल्हा शिक्षक भारती संघटनेचे कार्याध्यक्ष सुनील गाडगे यांनी दिली.
सरकारी कर्मचा-यांना चार महिन्यांचा महागाई भत्ता रोखीने देण्याचा आदेश राज्य सरकारने २९ जूनला काढला या पार्श्र्वभूमीवर जिल्हा शिक्षक भारती व महिला शिक्षक भारती संघटनेच्या पदाधिका-यांनी प्रभारी माध्यमिक शिक्षणाधिकारी नरेंद्र खंदारे व वेतन पथकाचे अधीक्षक संजय गंभिरे यांची भेट घेतली व थकीत मंजूर भत्ता त्वरित देण्याची मागणी केली. ती मान्य करताना येत्या ऑगस्टमध्ये हा फरक अदा करण्याचे आदेश खंदारे यांनी दिले.
जिल्ह्य़ातील ७३१ माध्यमिक शाळांतील १० हजार ६८१ शिक्षक व ४ हजार ८१६ शिक्षकेतर कर्मचा-यांना त्याचा लाभ मिळणार आहे. २८ फेब्रुवारी १०१२ अखेर जी बिले वेतन पथकाला सादर करण्यात आली, त्यासाठी ४ कोटी रुपयांची मागणी करण्यात आली आहे, निधी उपलब्ध होताच ती अदा करण्यात येतील, असे गंभिरे यांनी सांगितले. सरकारने जानेवारी २०१३ पासून महागाई भत्त्यात ८ टक्के वाढ केली आहे. १ मे पासूनची दरवाढ यापूर्वीच रोखीने दिली आहे. शाळांनी फरक तक्ते बिलासोबतच जोडावेत व वेतन १ तारखेलाच होण्यासाठी शाळांनी पगार बिले दि. १ ते दि. ७ पर्यंतच द्यावीत, असेही अवाहन गंभीरे यांनी केले.
पदाधिकारी बाबासाहेब लोंढे, मोहमदसमी शेख, आशा मगर, शोभना गायकवाड, विभावरी रोकडे, वैशाली आहेर आदींनी चर्चेत भाग घेतला.