मुंबई शेअर बाजार हजार अंशांनी कोसळला; डॉलरच्या तुलनेत भारतीय चलन विक्रमी नीचांकावर

मुंबई : अमेरिकी अर्थव्यवस्थेची मजबुती दर्शवणारी आकडेवारी, परिणामी तेथे आणखी व्याजदर कपात होण्याच्या मावळलेल्या शक्यतेने जगभरात बाजारात विक्रीची लाट निर्माण केली आणि त्याने स्थानिक बाजारात सेन्सेक्स-निफ्टी निर्देशांकांनाही सोमवारी धुऊन काढले. एक हजारहून अधिक अंशांनी गडगडलेला सेन्सेक्सने ७७ हजारांखाली बुडी मारली. दुसरीकडे रुपया डॉलर ५८ पैशांच्या दोन वर्षांतील सर्वाधिक घसरणीसह ८६.६२ च्या सर्वकालीन नीचांकावर गेला.

परकीय गुंतवणूकदारांच्या स्थानिक बाजारातून वेगाने सुरू असलेल्या माघारीनेही सोमवारच्या सत्रात आणखीच गती पकडली. परिणामी सेन्सेक्स दिवसअखेर १,०४८.९० अंशांच्या गटांगळीसह ७६,३३०.०१ स्थिरावला. दुसरीकडे निफ्टीनेही ३४५.५५ अंश घसरणीसह २३,१००च्या महत्त्वपूर्ण पातळीपासून फारकत घेतली. परकीय गुंतवणूकदारांना नववर्षातील आतापर्यंतच्या मोजक्या सत्रातच तब्बल २२, १९४ कोटी रुपयांहून अधिक समभाग विक्री केली आहे. भांडवली बाजारांत सलग चौथ्या दिवशी सुरू राहिलेल्या या घसरणीमुळे गुंतवणूकदारांची जवळपास २५ लाख कोटी रुपयांची मत्ता होत्याची नव्हती केली.

हेही वाचा >>> भारतात गाड्यांच्या विक्रीत दोन लाखांचा टप्पा; मर्सिडीज बेंझचा ‘आलिशान’ वरचष्मा कायम 

ढासळता रुपया, तेल भडक्याची चिंता

देशांतर्गत अर्थव्यवस्था वाढीचा दर ६.४ टक्क्यांचा चार वर्षांतील नीचांक गाठण्याचा अंदाज, गडगडत्या रुपयासह, देशांतर्गत कंपन्यांच्या तिमाही कामगिरीच्या आघाडीवरील निराशा, त्यातच खनिज तेलाच्या आंतरराष्ट्रीय किंमतीही पुन्हा पिंपामागे ८० डॉलरवर तापणे, अशा चिंतांचा वेढा बाजाराला पडला आहे. डॉलरच्या तुलनेत रुपया ८६.६२ या पातळीवर बंद झाला. दिवसभरात त्यात दोन वर्षांतील सर्वात मोठी ५८ पैशांची अर्थात ०.७ टक्के घसरण नोंदविण्यात आली. याआधी फेब्रुवारी २०२३ मध्ये रुपयात एवढी मोठी घसरण झाली होती.

छोट्या गुंतवणूकदारांनाच सर्वाधिक फटका

बाजारातील भीतीयुक्त नकारात्मकतेने बहुतांश समभागांत घसरण झाली. सर्वच क्षेत्रीय निर्देशांक लाल रंगात अर्थात घसरणीसह बंद होणे, असे क्वचितच घडते. तब्बल ५०८ समभागांचे भाव त्यांच्या वार्षिक नीचांकाखाली गडगडले. प्रमुख निर्देशांक म्हणजेच सेन्सेक्स-निफ्टीतील घसरण ही दीड-पावणे दोन टक्क्यांची असली तरी, व्यापक बाजारात त्याहून अधिक ३ ते ४ टक्क्यांची घसरण दिसून आली. छोट्या वैयक्तिक गुंतवणूकदारांनी धारण केलेल्या समभागांमधील घसरणीचे प्रमाण मोठे आणि त्यामुळे सर्वाधिक नुकसानही याच गुंतवणूकदारांच्या वाट्याला आले.

अमेरिकेत रोजगारवाढीच्या सप्ताहअखेर जाहीर झालेल्या आकडेवारीने जागतिक बाजारात गदारोळ उडवून दिला. परिणामी आधीच धष्टपुष्ट बनलेला डॉलर आणखी मजबूत झाला, तर अमेरिकी रोख्यांवरील परतावा दरही वाढून ५ टक्क्यांपुढील पातळीवर पोहोचला. त्यामुळे तेथे व्याजदरात कपात होणार नसल्याचे संकेत आहेत. त्यामुळे भारतासह विकसनशील देशांतील बाजारपेठांचे आकर्षण संपुष्टात येऊन, परकीय भांडवलाची अधिकच जोमाने माघारीची भीती आहे. – विनोद नायर, संशोधनप्रमुख, जिओजित फायनान्शियल सर्व्हिसेस