Adani Green Energy company profit : अदाणी समूहाच्या ग्रीन एनर्जी कंपनीच्या शेअरमध्ये रॉकेटसारखा वेग पाहायला मिळतो आहे. याचे कारण म्हणजे कंपनीचे तिमाही निकाल आहे. ज्यामध्ये कंपनीने जबरदस्त नफा नोंदवला आहे. अदाणी ग्रीन एनर्जीने मार्च तिमाहीत चारपट नफा कमावला आहे. आकडेवारीबद्दल बोलायचे झाल्यास कंपनीने ५०७ कोटी रुपयांचा नफा मिळवला आहे. कंपनीने शेअर बाजाराला दिलेल्या माहितीनुसार, ३१ मार्च २०२२ ला संपलेल्या तिमाहीत कंपनीचा नफा १२१ कोटी रुपये होता. जर महसुलाबद्दल बोलायचे झाल्यास एका वर्षापूर्वी मार्च तिमाहीत तो १,५८७ कोटी रुपये होता, जो वाढून २,९८८ कोटी रुपये झाला आहे, जे जवळजवळ दुप्पट आहे.
ग्रीन एनर्जी कंपनीचा महसूलही वाढला
२०२२-२३ या आर्थिक वर्षासाठी कंपनीचा नफा मागील आर्थिक वर्षातील ४८९ कोटी रुपयांच्या तुलनेत जवळपास दुप्पट झाला आहे. २०२२-२३ या आर्थिक वर्षात कंपनीचा नफा ९७३ कोटी रुपये झाला आहे. २०२२-२३ या आर्थिक वर्षात कंपनीचे एकूण उत्पन्न एक वर्षापूर्वी ५,५४८ कोटी रुपयांवरून ८,६३३ कोटी रुपये झाले. अदाणी ग्रीन एनर्जीने कंपनीचे एमडी आणि सीईओ विनीत एस. जैन यांना कंपनीचे एमडी पद बहाल केले असून, ते ११ मे २०२३ पासून कार्यान्वित होणार आहे.
हेही वाचाः पुढील ५ वर्षांत जवळपास १.४० कोटी नोकऱ्या धोक्यात; भारतावर काय परिणाम होणार? वाचा सविस्तर
अक्षय ऊर्जा क्षमतेत वाढ
कंपनीच्या म्हणण्यानुसार, आर्थिक वर्ष २०२३ मध्ये ऊर्जा विक्री वार्षिक आधारावर ५८ टक्क्यांनी वाढून १४,८८० दशलक्ष युनिट्स झाली आहे. अदाणी ग्रीनने वित्तीय वर्ष २३ मध्ये २,६७६ मेगावॅट अक्षय ऊर्जा क्षमता त्यांच्या परिचालन ताफ्यात समाविष्ट केली आहे. ज्यामध्ये राजस्थानमधील २,१४० मेगावाट सौर-पवन संकरित प्रकल्प, मध्य प्रदेशातील ३२५ मेगावाट सौर ऊर्जा प्रकल्प आणि राजस्थानमधील २१२ मेगावाट सौर ऊर्जा प्रकल्पाचा समावेश आहे. अदाणी ग्रीनने आर्थिक वर्ष २०२३ मध्ये SECI बरोबर ४५० मेगावाट पवन प्रकल्प आणि ६५० मेगावाटच्या सौर प्रकल्पांसाठी PPA वर स्वाक्षरी केली आहे, ज्यामुळे प्रकल्पाची पाइपलाइन आणखी मजबूत होईल.
हेही वाचाः आतापर्यंतचे ऐतिहासिक जीएसटी संकलन; एप्रिलमध्ये १.८७ लाख कोटी रुपये जमा
अदाणी ग्रीनचे शेअर्स वाढू शकतात
चांगल्या निकालानंतर आज कंपनीच्या शेअर्समध्ये तेजी पाहायला मिळू शकते. तीन दिवसांच्या सुट्टीनंतर मंगळवारी शेअर बाजार उघडतील. तसे शुक्रवारी अदाणी ग्रीनच्या शेअर्समध्ये ३.६७ टक्क्यांची वाढ झाली आणि कंपनीचा शेअर ९५०.६० रुपयांवर बंद झाला. २८ एप्रिल रोजी कंपनीचा शेअर ४३९.३५ रुपयांसह ५२ आठवड्यांच्या नीचांकी पातळीवर गेला. त्यानंतर कंपनीच्या शेअर्समध्ये ११६.३६ टक्क्यांची वाढ झाली आहे.