प्रतिसाद : ‘महिला व्होट बँक’ हवीच कशाला?

वेगळा संसार थाटण्याचं मूळ

‘स्वतंत्र संसार थाटण्याचा निर्णय : समंजस की असमंजस?’ हा अॅड. रोहित एरंडे यांचा लेख (६ एप्रिल) खूप आवडला. इतकी वर्षं चर्चा न होता हा सामाजिक प्रश्न तसाच राहिला होता. भारतीय एकत्र कुटुंबपद्धतीचं आपण कौतुक करतो, ती भंग का होऊ लागली, याच्या शोधात खरं तर स्वतंत्र संसार थाटण्याची मुळे आहेत. ‘ऊन पाऊस’ या राजा परांजपे यांच्या चित्रपटात हा सांस्कृतिक सांधाबदल योग्य रीतीनं टिपला आहे. अॅड. एरंडे यांनी वर्णन केलेल्या सत्यकथा आणि समस्या हा संस्कृतीची आर्थिक संरचना बदलण्याचा परिणाम आहे. त्याचं उत्तर शोधलं, तर प्रत्येक व्यक्ती उपाय शोधण्याच्या क्षमतेत राहील. अन्यथा ही व्यवस्था कोणाच्या तरी फायद्यासाठी आणि कुटुंबात भेद निर्माण करण्यासाठी कार्यरत राहील.-उमेश जोशी

आपल्या माणसांचं ‘असणं’

‘आपल्या माणसांचं ‘असणं’ हा संकेत पै यांचा लेख (६ एप्रिल) वाचला. आपल्या विकासाच्या दृष्टीनं ते आवश्यक असतं. मी आयुष्यात जी काही प्रगती केली, त्यामागे माझी आई, बहीण, माझ्या इंग्रजी भाषेसाठी मेहनत घेणारे माझे गुरूजी, नोकरीत भेटलेले वरिष्ठ, सहकारी यांचा सहभाग खूप मोलाचा आहे. कंपनीनं जाहीर केलेली मुदतपूर्व सेवानिवृत्ती घेण्याचा माझा विचार होता. परंतु माझे वरिष्ठ आणि एक मित्र यांनी मला त्यापासून परावृत्त केलं. त्याचा मला खूप फायदा झाला. त्यामुळे मला हे अगदी खरं वाटतं, की आपल्या माणसांचं ‘असणं’ महत्त्वाचं असतंच. -नीता शेरे