Asaduddin Owaisi on Vikram Misri : ‘ऑपरेशन सिंदूर’मुळे चर्चेत आलेल्या विक्रम मिस्रींना ट्रोल करणार्‍यांना ओवेसींनी सुनावलं; म्हणाले, “सभ्य, प्रामाणिक…”

असदुद्दीन ओवेसी यांनी त्यांच्या पोस्टमध्ये भारताचे परराष्ट्र सचिव विक्रम मिस्री यांना कष्टाळू आणि प्रामाणिक डिप्लोमॅट म्हटले आहे. ओवेसी यांनी लिहीलं की, “विक्रम मिस्री एक सभ्य, प्रामाणिक आणि मेहनती डिप्लोमॅट आहेत, जे आपल्या देशासाठी अथक मेहनत घेत आहेत. आपले नागरी सेवा अधिकारी हे एक्झिक्युटीव्हच्या अंतर्गत काम करतात हे आपण लक्षात ठेवले पाहिजे आणि एक्झिक्युटीव्ह किंवा देश चालवणाऱ्या कोणत्याही राजकीय नेतृत्वाकडून घेतल्या गेलेल्या निर्णयासाठी त्यांना दोषी ठरवले जाऊ नये.”

काँग्रेस नेत्याचाही ट्रोलर्सना तोंड बंद ठेवण्याचा सल्ला

ओवेसी यांच्याबरोबरच काँग्रेसचे नेते सलमान अनीस सोज यांनी देखील परराष्ट्र सचिव विक्रम मिस्री यांची बाजू घेत ट्रोल करणाऱ्यांना फटकारले आहे. त्यांनी सोशल मीडिया प्लॅटफॉर्म एक्सवर लिहिले की, “विक्रम मिस्री हे एक काश्मीरी आहेत आणि त्यांनी भारताचा गौरव वाढवला आहे. कोणत्याही प्रकारचे ट्रोलींग त्यांची देशाप्रती केलेली सेवा कमी करू शकत नाही. जर आभार मानू शकत नसाल तर तुमचं तोंड बंद ठेवा.”

ट्रोल का केलं जातंय?

मीडिया रिपोर्ट्सनुसार, भारताचे परराष्ट्र सचिव विक्रम मिस्री, कर्नल सोफिया कुरेशी आणि विंग कमांडर व्योमिका सिंह हे तीन जण पहलगाम दहशतवादी हल्ल्यानंतर भारताने केलेल्या ऑपरेशन सिंदूरनंतर चर्चेत आले आहेत. हे तीन जण भारताने केलेल्या कारवाईची माहिती माध्यमांसमोर येऊन देत होते. पण भारत आणि पाकिस्तान यांच्या शस्त्रविराम झाल्याचे काही लोकांना आवडले नाही, यावर नाराज झालेल्या लोकांनी परराष्ट्र सचिव विक्रम मिस्री यांना वाईट पद्धतीने ट्रोल करण्यात सुरूवात केली.