DRDO Guest House Spying Case: राजस्थान पोलिसांच्या गुप्तचर शाखेने मंगळवारी जैसलमेरमधील चंदन फिल्ड फायरिंग रेंज येथे असलेल्या संरक्षण संशोधन आणि विकास संघटनेच्या (DRDO) गेस्ट हाऊसमधील व्यवस्थापकाला हेरगिरीच्या आरोपाखाली अटक केली आहे. पाकिस्तानच्या आयएसआय संघटनेसाठी हेरगिरी केल्याच्या आरोपाखाली आठवड्याभरापूर्वी महेंद्र सिंहला ताब्यात घेण्यात आले होते. पोलीस आणि सुरक्षा यंत्रणांनी जयपूर येथे केलेल्या संयुक्त चौकशीत महेंद्र सिंहचा हेरगिरीतील सहभाग स्पष्ट झाल्याचे वरिष्ठ अधिकाऱ्यांनी सांगितले. शासकीय गुपिते अधिनियम, १९२३ कायद्यानुसार त्याच्यावर गुन्हा दाखल करण्यात आला आहे.
पोलिस महानिरीक्षक विष्णुकांत म्हणाले, महेंद्र सिंह हा उत्तराखंडच्या अलमोरा येथील रहिवासी आहे. त्याने पाकिस्तानी हेरांना संवेदनशील माहिती पुरविली होती. जैसलमेरच्या चंदन फिल्ड फायरिंग रेंजला भेट देणाऱ्या डीआरडीओ शास्त्रज्ञ आणि भारतीय लष्करातील अधिकाऱ्यांची माहिती त्याच्याकडून गुप्तहेरांना पुरविली जात होती, असा आरोप करण्यात येत आहे.
महेंद्र सिंह क्षेपणास्त्र आणि इतर शस्त्रास्त्रांच्या चाचण्यांबद्दलची माहितीही पुरवत होता, असे विष्णुकांत म्हणाले. चार ते पाच वर्षांपासून महेंद्र सिंह गेस्ट हाऊसमध्ये नोकरी करत होता.
जयपूरच्या केंद्रीय चौकशी केंद्रात विविध गुप्तचर संस्थांनी संयुक्तपणे महेंद्र सिंहची चौकशी केली. तसेच त्याच्या मोबाइल फोनची तांत्रिक तपासणी करण्यात आली आहे. ज्यामध्ये डीआरडीओ आणि भारतीय सैन्याशी संबंधित संवेदनशील माहिती त्याने पाकिस्तानी हँडलर्सबरोबर शेअर केल्याचे सिद्ध झाले.