शासकीय कार्यालयांतून ई-नोटीस? केंद्रीय गृह विभागाचा नागरिकांना सावधानतेचा इशारा

शासकीय ई-नोटिशीच्या नावाखाली अनेक फसवे ईमेल पाठवले जात आहेत, त्यामुळे वापरकर्त्यांनी सजग राहावे, असे आवाहन भारतीय सायबर गुन्हे समन्वय केंद्राने (आय४सी) सार्वजनिक जाहिरातीच्या माध्यमातून केले आहे. अशा प्रकारच्या फसव्या नोटिशींमुळे नागरिक सायबर फसवणुकीला बळी पडू शकतात, असा इशारा ‘आय४सी’ने दिला असून ईमेलच्या सत्यतेची पडताळणी करण्यासाठी काही सूचना केल्या आहेत.

हेही वाचा >>> अतिआत्मविश्वासाचा फटका! प्रदेश भाजपच्या बैठकीत योगी आदित्यनाथ यांचे आत्मपरीक्षण

गृह मंत्रालयाबरोबरच या महिन्याच्या सुरुवातीला केंद्रीय अर्थ मंत्रालयाने दिल्ली पोलीस सायबर गुन्हे आणि आर्थिक गुन्हे विभाग, केंद्रीय आर्थिक गुप्तचर विभाग, गुप्तचर विभाग आणि दिल्लीचा सायबर विभाग यांची नावे, स्वाक्षरी, शिक्के आणि बोधचिन्ह यांचा समावेश असलेल्या फसव्या ईमेलबाबत वापरकर्त्यांना सावध करणारी एक सार्वजनिक सूचना जारी केली होती. या ई-मेलमधून प्राप्तकर्त्यांवर विशेषत: लैंगिक गुन्हेगारीचे आरोप करण्यात येतात, असे ईमेल मिळाल्यानंतर पोलिसांकडे किंवा सायबर पोलिसांकडे तक्रार करण्याचा सल्ला अर्थ विभागाने दिला आहे. ‘आय४सी’ने गेल्या वर्षी ऑगस्टमध्ये अशाच प्रकारची सूचना जारी केली होती.

ईमेलमधील लिंकवर क्लिक करण्यापूर्वी…

क्लिक करण्यापूर्वी किंवा अशा ईमेलला उत्तर देण्यापूर्वी खातरजमा करण्यासाठी ‘आय४सी’ने काही सूचना केल्या आहेत. ही ईमेल gov. in ने संपणाऱ्या संकेतस्थळावरून तयार झाली आहे का, हे तपासा; ईमेलमध्ये नमूद केलेल्या अधिकाऱ्यांच्या नावासंबंधी इंटरनेटवर माहिती तपासा; ज्या विभागातून ईमेल प्राप्त झाले असल्याचा दावा आहे, त्या विभागाला संपर्क करून पडताळणी करून घ्या.