Delhi CM Rekha Gupta attacker information Reveal : दिल्लीच्या मुख्यमंत्री रेखा गुप्ता यांच्यावर बुधवारी (२० ऑगस्ट) एका सार्वजनिक कार्यक्रमादरम्यान हल्ला झाला. एका इसमाने रेखा गुप्ता यांच्या कानशिलात लगावली. तसेच त्याने गुप्ता यांच्या कार्यकर्त्यांबरोबर धकाबुक्की केली. मुख्यमंत्री गुप्ता यांच्यावर हल्ला करणाऱ्या आरोपीला दिल्लीमधील सिव्हिल लाइन्स पोलिसांनी ताब्यात घेतलं असून त्याचा फोटो देखील समोर आला आहे. पोलीस सध्या त्याची चौकशी करत आहेत.
सिव्हिल लाइन्स पोलिसांनी केलेल्या चौकशीत आरोपीने त्याचं नाव राजेशभाई खिमजीभाई साकरिया असं असल्याचं सांगितलं आहे. ४१ वर्षीय राजेश गुजरातमधील राजकोट येथील रहिवासी आहे. दिल्ली पोलीस राजेशबाबत अधिक माहिती घेण्यासाठी राजकोट पोलिसांच्या संपर्कात आहेत. दिल्ली पोलीस सध्या राजेशने दिलेली माहिती तपासून पाहात आहेत.
आरोपी त्याच्या नातेवाईकाला तुरुंगात सोडवण्यासाठी प्रयत्न करतोय. यासंदर्भात दिल्लीच्या मुख्यमंत्री रेखा गुप्ता यांनी त्याची मदत करावी म्हणून तो त्यांना भेटायला गेला होता, असं प्राथमिक तपासानंतर सांगण्यात आलं आहे.
नेमकं काय घडलं
दिल्ली भाजपाचे अध्यक्ष वीरेंद्र सचदेवा यांनी घडलेल्या प्रकाराची माहिती देत सांगितलं की “आज सकाळी मुख्यमंत्री रेखा गुप्ता जनसुनावणी (जनतेच्या समस्या जाणून घेण्यासाठी सुरू केलेला साप्ताहिक उपक्रम)घेत होत्या. जनसुनावणीवेळी त्या लोकांमध्ये मिसळल्या होत्या. त्या लोकांशी संवाद साधत असताना एक तरुण त्यांच्याजवळ आला. त्याने मुख्यमंत्र्यांना काही कागद दाखवले. मुख्यमंत्री गुप्ता ते कागद पाहत असतानाच त्या तरुणाने मुख्यमंत्र्यांच्या कानशिलात लगावली. यावेळी आमचे कार्यकर्ते व आरोपीमध्ये धक्काबुक्की देखील झाली. धक्काबुक्की चालू असताना मुख्यमंत्र्यांचं डोकं एका टेबलावर आदळलं. मात्र, कार्यकर्ते व उपस्थित लोकांनी आरोपीला पकडून मुख्यमंत्री आवासातील पोलिसांच्या ताब्यात दिलं. त्यानंतर सिव्हिल लाइन्स पोलीस आरोपीला घेऊन गेले. पोलीस या प्रकरणाचा अधिक तपास करत आहेत.”
सचदेवा यांनी सांगितलं की “डॉक्टरांनी मुख्यमंत्री रेखा गुप्ता यांची तपासणी केली असून त्यांची प्रकृती आता स्थिर आहे. घडलेल्या घटनेचा त्यांना मोठा धक्का बसला आहे. त्या थोडी विश्रांती घेऊन लवकरच पुन्हा एकदा जनतेत मिसळतील.”