पाकिस्तानी ‘एनजीओं’ची करोना मदतीआडून दहशतवादी कारवायांना मदत?; गोपनीय अहवालातून धक्कादायक खुलासा

डीसइन्फो लॅबच्या या अहवालामध्ये किती पैसे गोळा करण्यासंदर्भातील या संस्थाची योजना होती याबद्दलही खुलासा करण्यात आलाय. पैसे गोळा करणाऱ्या संस्थांमध्ये इमाना म्हणजेच इस्लामिक मेडिकल असोसिएशन ऑफ नॉर्थ अमेरिका या संस्थेचाही समावेश होता. २७ एप्रिल २०२१ रोजी या संस्थेने आपल्या सोशल नेटवर्किंग पेजेस आणि खात्यांवरुन #Helpindiabreathe या हॅशटॅगसहीत भारताच्या नावाखाली पैसे गोळा करण्यास सुरुवात केली. सुरुवातीली १.८ कोटी डॉलर निधी उभारण्याचं लक्ष्य संस्थेने ठेवलं होतं. मात्र या मोहीमेमध्ये नक्की किती पैसे मदत म्हणून लोकांनी दिले याची सविस्तर आकडेवारी संस्थेने दिलेली नाही. तसेच हे पैसे कुठे आणि कसे खर्च केले जात आहेत किंवा केले जाणार आहेत यासंदर्भातील माहिती देण्यात आलेली नाही. हा इतिहासातील सर्वात मोठा घोटाळा असल्याचा दावा डीसइन्फो लॅबने केलाय. १९६७ मध्ये स्थापना झालेल्या इमनाचे कोठेही कार्यालय किंवा काम केलं जात नसल्याचा दवा अहवालात करण्यात आलाय. त्यामुळेच कारवाई करुन या संस्थेच्या माध्यमातून होणारं निधी संकलन थांबवणं कठीण काम असल्याचं अहवालात म्हटलं आहे.

नक्की वाचा >> भारतातील करोना परिस्थिती पाहून पाकिस्तानीही हळहळले; #PakistanstandswithIndia पाकमध्ये Top Trend

करोनाच्या दुसऱ्या लाटेमध्ये भारतात रुग्णसंख्येमध्ये मोठ्या प्रमाणात वाढ झाल्याने एप्रिल आणि मे महिन्यात अनेक शहरांमध्ये आरोग्य व्यवस्थांचा तुटवडा जाणवला. यामध्ये ऑक्सिजन, व्हेंटिलेटर्सच्या तुटवड्याच्या बातम्या जगभरातील प्रसारमाध्यमांनी दिल्या. त्यामुळेच जगभरातील वेगवेगळ्या देशांनी भारताला मदत केली होती. पाकिस्तानमधील अनेक कलाकारांनी या संकट काळात भारताला मदत करण्याचं आवाहन केलं होतं.