Longest Living Animals: पृथ्वीवरील प्रत्येक प्राण्याची जीवनशैली, रंग-रूप, अन्न, निवारा या सगळ्या गोष्टी खूप वेगवेगळ्या असतात. काही प्राणी जन्माला आल्यानंतर काही काळच जगतात, तर हत्ती, कासव आणि शार्कसारखे काही प्राणी १०० वर्षांपेक्षा जास्त जगतात. पण या प्राण्यांव्यतिरिक्त काही प्राणी असेदेखील आहेत, जे तब्बल १०,०००- १५,००० वर्षेही जगतात. ही गोष्ट अनेकांना खोटी वाटू शकते. परंतु हो, हे सत्य आहे की, खोल समुद्रातील काही प्राणी जवळजवळ कैक वर्षे जगू शकतात.
उदाहरणार्थ- लाइव्ह सायन्सच्या मते, समुद्री प्राणी सर्वांत जास्त काळ जगतात कारण- पाण्यातील परिस्थिती स्थिर आणि सुसंगत असते. या सर्वांत जास्त काळ जगणाऱ्या प्राण्यांमध्ये त्यांच्या पेशी अमर्यादपणे पुन्हा निर्माण करण्याची उल्लेखनीय गुणवत्ता असते, ज्यामुळे वृद्धत्वाची प्रक्रिया उलट होते.
पृथ्वीवरील सर्वांत जास्त काळ जगणारे प्राणी
हायड्रा
हायड्रा हा गोड्या पाण्यात आढळणारा इंचभर लांबीचा अपृष्ठवंशीय प्राण्यांचा समूह आहे, जो जेली फिशसारखा दिसतो. या प्राण्याच्या अनेक वर्षे जगण्याच्या जीवनाचे रहस्य म्हणजे ते स्टेम पेशींपासून बनलेले असतात, असे लाइव्ह सायन्सने म्हटले आहे. या पेशी सतत स्वतःचे नूतनीकरण करतात, ज्यामुळे ते केवळ दीर्घायुषीच नाही, तर अमरही होऊ शकतात. ते स्वतःचे खराब झालेले भाग बदलू शकतात; परंतु ते भक्षक किंवा आजारामुळे मरू शकतात.
टुरिटोप्सिस डोहर्नी
‘अमर जेली फिश’ म्हणूनही ओळखले जाणारा टुरिटोप्सिस डोहर्नी हा सागरी प्राणी आहे, जो अनेक वर्षे जगू शकतो. नॅशनल म्युझियम ऑफ नॅचरल हिस्ट्रीनुसार, टुरिटोप्सिस डोहर्नी पॉलीप्समध्ये रूपांतरित होण्यापूर्वी अळी म्हणून जीवन सुरू करतो. हे पॉलीप्स नंतर मुक्त पोहणारे मेडुसा तयार करतात, ज्यांना जेली फिशदेखील म्हणतात. प्रौढ टी. डोहर्नी हे अद्वितीय आहेत. कारण- जर त्यांना शारीरिक हानी झाली किंवा अन्नाची कमतरता भासली, तर ते पॉलीप्समध्ये परत रूपांतरित होऊ शकतात. म्हणून हे जेली फिश त्यांचे जीवनचक्र अनेक वेळा उलटवू शकतात आणि वृद्धापकाळाने कधीही मरत नाहीत.
ग्लास स्पंज
ग्लास स्पंज हे सर्वांत जास्त काळ जगणाऱ्या प्राण्यांच्या प्रजातींपैकी एक आहेत. हे खोल समुद्रातील प्राणी आहेत जे १०,०००-१५,००० वर्षांहून अधिक काळ जगू शकतात. ते कोरलसारखेच दिसतात. इंटरनॅशनल फंड फॉर अ‍ॅनिमल वेल्फेअर (IFAW) नुसार, अंटार्क्टिकाच्या खाडीतील मूळ ग्लास स्पंज, रॉस सी हा पृथ्वीवरील सर्वांत जुना जिवंत प्राणी आहे, असे संशोधकांनी सांगितले.
काळे कोरल
खोल समुद्रात आढळणारे, कोरल हे पॉलीप्स म्हणून ओळखल्या जाणाऱ्या अपृष्ठवंशीय प्राण्यांच्या बाह्य कंकालपासून तयार झालेल्या दोलायमान खडक आणि वनस्पतींसारखे दिसतात. लाइव्ह सायन्सनुसार, हे पॉलीप्स स्थलांतरित होतात आणि स्वतःची जागा घेतात ज्यामुळे प्रवाळ बाह्य कंकाल संरचनेचा विस्तार होतो.
खोल पाण्यातील काळे कोरल हे सर्वांत जास्त काळ जगणारे आहेत. लाइव्ह सायन्सनुसार, ते हवाईमध्ये सर्वाधिक आढळतात आणि त्यांचे रेडिओकार्बन ४,२६५ वर्षे जुने असल्याचे आढळून आले आहे.
महासागरातील क्वाहॉग क्लॅम्स
उत्तर अटलांटिक महासागरातील मूळ निवासी सागरी क्वाहॉग क्लॅम ५०० वर्षांहून अधिक काळ जगू शकतात. हे क्लॅम सामान्यतः मानवी वापरासाठी व्यावसायिकरीत्या गोळा केले जातात. २००६ मध्ये आइसलँडच्या किनाऱ्यावर सापडलेला एक क्लॅम ५०७ वर्षे जुना असल्याचे आढळून आले, असा दावा बांगोर विद्यापीठातील शास्त्रज्ञांनी केला आहे.