अंगाची काहिली करणाऱ्या मेलबर्नच्या तप्त वातावरणात रॉजर फेडररने ज्येष्ठ खेळाडू स्टीफन एडबर्ग यांच्या मार्गदर्शनाखाली विजयी श्रीगणेशा केला. जेतेपदासाठी प्रबळ दावेदार असणाऱ्या अँडी मरे, राफेल नदाल यांनीही आपापल्या लढती जिंकत यशस्वी सुरुवात केली. महिलांमध्ये सेरेनाच्या बरोबरीने जेतेपदासाठी शर्यतीत असणाऱ्या व्हिक्टोरिया अझारेन्का, मारिया शारापोव्हा यांनी संघर्षपूर्ण विजय मिळवत दुसऱ्या फेरीत आगेकूच केली.
तब्बल १७ ग्रँड स्लॅम जेतेपदे नावावर असणाऱ्या फेडररसाठी २०१३ वर्ष दु:स्वप्न ठरले. एकाही ग्रँड स्लॅम जेतेपदावर त्याला नाव कोरता आले नाही. याव्यतिरिक्त एटीपी दर्जाच्या जेमतेम दोन जेतेपदांची त्याने कमाई केली. या सुमार प्रदर्शनामुळे फेडररच्या निवृत्तीच्या चर्चाना उधाण आले होते. मात्र फेडररने याचा इन्कार करत २०१४ मध्येही खेळणार असल्याचे स्पष्ट केले. विजयपथावर परतण्यासाठी फेडररने आपल्या प्रशिक्षकांच्या चमूत स्टीफन एडबर्गला समाविष्ट केले. एडबर्ग यांच्या मार्गदर्शनाखालीच फेडररने ऑस्ट्रेलियन खुल्या स्पर्धेत विजयी सलामी दिली. सहाव्या मानांकित फेडररने ऑस्ट्रेलियाच्या जेम्स डकवर्थचा ६-४, ६-४, ६-२ असा पराभव केला. यंदाची ऑस्ट्रेलियन खुली स्पर्धा फेडरर सहभागी होत असलेली ५७वी ग्रँड स्लॅम स्पर्धा आहे. उष्ण वातावरणाचा खेळावर कोणताही परिणाम होऊ न देता फेडररने सफाईदार विजय मिळवला. ज्यांना पाहून टेनिस खेळायची प्रेरणा मिळायची, त्या एडबर्ग यांच्या मार्गदर्शनाखाली खेळणे हा सन्मान असल्याचे फेडररने सांगितले.
अँडी मरेला तीन वेळा ऑस्ट्रेलियन खुल्या स्पर्धेच्या उपविजेतेपदावर समाधान मानावे लागले आहे. हा इतिहास बदलण्याची मरेला चांगली संधी आहे. त्या दृष्टीने पहिल्या लढतीत जपानच्या गो सोइडावर ६-१, ६-१,
६-३ अशी सहज मात करत त्याने आत्मविश्वासपूर्ण सुरुवात केली.
गेल्या वर्षी गुडघ्याच्या गंभीर दुखापतीतून दिमाखदार पुनरागमन करणाऱ्या राफेल नदालला सलामीच्या लढतीत विजयी घोषित करण्यात आले. राफेल नदालने पहिला सेट ६-४ असा जिंकला होता. त्या वेळी प्रतिस्पर्धी ऑस्ट्रेलियाचा बरनॉर्ड टॉमिकने दुखापतीमुळे माघार घेतली. अर्जेटिनाच्या ज्युआन मार्टिन डेल पोट्रोने अमेरिकेच्या ऱ्हाइन विल्यम्सवर ६-७, ६-३, ६-४, ६-४ असा विजय मिळवला.
सलग तिसऱ्या ऑस्ट्रेलियन खुल्या स्पर्धेच्या जेतेपदासाठी आतूर असलेल्या व्हिक्टोरिया अझारेन्काला पहिल्या लढतीत विजयासाठी झगडावे लागले. द्वितीय मानांकित अझारेन्काने जागतिक क्रमवारीत ९१व्या स्थानी असलेल्या जोहाना लार्सनचा ७-६ (७-२), ६-२ असा पराभव केला. टाळता येण्यासारख्या चुका, सदोष सव्‍‌र्हिस आणि प्रचंड तप्त वातावरण यामुळे अझारेन्काला लौकिकाला साजेसा खेळ करता आला नाही. दुखापतीनंतर पुनरागमन करणाऱ्या शारापोव्हाने अमेरिकेच्या बेथनी मॅटेक सँण्ड्सला ६-३, ६-४ असे पराभूत केले.
सोमदेव देववर्मनचे आव्हान संपुष्टात
मेलबर्न : ऑस्ट्रेलियन खुल्या टेनिस स्पर्धेच्या एकेरी प्रकारातील भारताचे आव्हान संपुष्टात आले. भारताच्या सोमदेव देववर्मनला सलामीच्या लढतीतच पराभवाला सामोरे जावे लागले. स्पेनच्या २६व्या मानांकित फेलिसिआनो लोपेझने सोमदेववर ६-४, ६-४, ७-६(२) अशी मात केली. जागतिक क्रमवारीत ९७व्या स्थानी असलेल्या सोमदेवला पहिल्या सेटमध्ये दोन ब्रेकपॉइंट्स मिळाले, मात्र त्याचा फायदा त्याला उठवता आला नाही. दुसऱ्या सेटमध्ये सोमदेवने तीन ब्रेकपॉइंट्स वाचवले, मात्र लोपेझने सरशी साधली. तिसऱ्या सेटमध्ये लोपेझला सोमदेवने जोरदार टक्कर दिली, मात्र चुरशीच्या लढतीत लोपेझने बाजी मारली.
प्रचंड उष्णतेने स्पर्धक, संयोजक हैराण
मेलबर्न : ऑस्ट्रेलियन खुली टेनिस स्पर्धा टेनिसविश्वातला पहिला मानबिंदू. जेतेपदासाठी होणारी रस्सीखेच स्वाभाविक आहे, मात्र अतिउष्ण वातावरणामुळे खेळाडू, संयोजक सर्वच जण हैराण झाले आहेत. गेल्या वर्षीही प्रचंड उष्ण वातावरणाचा कामगिरीवर फटका बसत असल्याची तक्रार खेळाडूंनी केली होती. मात्र संयोजकांनी स्पर्धेच्या वेळापत्रकात कोणताही बदल केला नाही. यंदा उष्णतेत वाढ झाल्याने खेळाडूंच्या समस्येत भर पडली आहे. पादत्राणे, मोजे परिधान केलेले असतानाही चटके बसत असल्याची तक्रार खेळाडू करीत आहेत. वातावरणातला उष्मा वाढल्याने काही खेळाडूंना चक्कर आली, तर काहींना उलटी झाली. यादरम्यान एका बॉलबॉय चक्कर येऊन पडल्याने या विषयाचे गांभीर्य वाढले आहे. मंगळवारी तापमान ४२ अंश सेल्सियस झाल्याने पिण्याच्या पाण्याच्या प्लॅस्टिकच्या बाटल्या वितळल्याचे चित्र पाहायला मिळाले. अनेक खेळाडूंना सामनादरम्यान थकव्यामुळे विश्रांती घ्यावी लागली.