WTC 2025-27 Schedule: वर्ल्ड टेस्ट चॅम्पियनशिप २०२५-२७ चे वेळापत्रक जाहीर, टीम इंडिया कधी आणि कोणाविरुद्ध खेळणार सामने? जाणून घ्या

WTC 2025-17 Schedule Announced: दक्षिण आफ्रिका २०२३-२५ च्या जागतिक कसोटी अजिंक्यपद स्पर्धेचा चॅम्पियन संघ ठरला. WTCच्या अंतिम सामन्याच्या एका दिवसानंतर, आंतरराष्ट्रीय क्रिकेट परिषदेने (ICC) WTC २०२५-२७ चे वेळापत्रक जाहीर केले आहे. वर्ल्ड टेस्ट चॅम्पियनशिपचे पुढील चक्र १७ जूनपासून सुरू होणार आहे. पहिला सामना श्रीलंकेतील गॅले येथे श्रीलंका आणि बांगलादेश यांच्यात खेळवला जाईल.

वेळापत्रकानुसार, ऑस्ट्रेलिया यावेळी जास्तीत जास्त २२ सामने खेळेल, तर इंग्लंडला २१ सामने खेळावे लागतील. या वर्षाच्या अखेरीस अॅशेस मालिकेदरम्यान दोन्ही संघ एकमेकांशी भिडतील. तर भारतीय संघ २० जूनपासून नव्या वर्ल्ड टेस्ट चॅम्पियनशिप मोहिमेला सुरूवात करणार आहे.

एकूण ७१ सामने असलेले आणि पुढील दोन वर्षांच्या कालावधीत होणाऱ्या WTC 2025-27 या चक्रामध्ये नऊ संघ सहभागी होतील. दोन वेळा उपविजेता ठरलेला भारतीय संघ शुबमन गिलच्या नेतृत्वाखाली एका नवीन युगाला सुरूवात करेल. भारतीय संघ माजी कर्णधार रोहित शर्मा आणि विराट कोहली यांच्या अनुपस्थितीत २० जूनपासून हेडिंग्ले येथे अँडरसन-तेंडुलकर ट्रॉफीसह सुरूवात करेल.

दक्षिण आफ्रिका घरच्या मैदानावर कधी खेळणार कसोटी सामना?

ऑगस्ट २०२४ पासून तेंबा बावूमाच्या नेतृत्वाखाली सलग नऊ कसोटी सामन्यांमध्ये अपराजित राहिलेला नवीन विश्वविजेता दक्षिण आफ्रिका ऑक्टोबर २०२५ मध्ये पाकिस्तानमध्ये नवीन चक्रातील पहिली कसोटी मालिका खेळेल. तथापि, दक्षिण आफ्रिकेचे चाहते १५ महिन्यांनंतर सप्टेंबर २०२६ मध्ये संघाला घरच्या मैदानावर कसोटी खेळताना पाहतील.

WTC 2025-27 च्या चक्रामध्ये भारत किती सामने खेळेल?

२०२५-२७ च्या वर्ल्ड टेस्ट चॅम्पियनशिप चक्रात भारत १८ कसोटी सामने खेळणार आहे, ज्यामध्ये वेस्ट इंडिज, दक्षिण आफ्रिका आणि ऑस्ट्रेलियाविरुद्ध घरच्या मैदानावर मालिका, तसेच इंग्लंड, श्रीलंका आणि न्यूझीलंड दौऱ्यावर संघ जाणार आहे.