KKR vs RCB सामना पावसामुळे रद्द झाला तर काय होणार? काय आहे IPLचा नियम

आयपीएल २०२५ च्या पहिल्याच सामन्यात पाऊसही हजेरी लावणार आहे. कोलकातामध्ये जोरदार पावसाच्या सरी येणार असल्याची माहिती हवामान विभागाने नोंदवली आहे. याशिवाय कालपासूनच मुसळधार पाऊसदेखील सुरू आहे. अशातच जर आरसीबी वि. केकेआरचा सामना रद्द झाला तर काय होणार, जाणून घेऊया.

कोलकातामध्ये हवामान खात्याने ऑरेंज अलर्ट जारी केला आहे. अॅक्युवेदर.कॉमने दिलेल्या माहितीनुसार, शनिवारी संध्याकाळी पाऊस पडू शकतो, तर ढगाळ वातावरण राहील. भारतीय हवामान खात्याने शनिवारी गडगडाटी वादळासह पावसाचा इशारा दिला आहे. बंगालच्या महासागरात हवेचा पट्टा तयार झाल्याने पाऊस पडण्याची चिन्हं आहेत.

कोलकातामधील या पावसामुळे जर सामना रद्द झाला तर काय नियम आहे पाहूया. आयपीएलमधील लीग टप्प्यातील सामन्यांमध्ये कोणताही राखीव दिवस नसतो. मात्र, पावसामुळे सामन्याला उशीर झाल्यास अतिरिक्त वेळ दिला जातो. आयपीएलमधील सामना संध्याकाळी ७.३० वाजता आहे, तर रात्री ११ वाजता सामना संपतो, परंतु पावसामुळे अतिरिक्त एका तासाची वेळ दिली जाते.

T20 क्रिकेटमधील कोणत्याही सामन्याच्या निकालासाठी किमान ५- षटकांचा सामना होणं आवश्यक आहे. त्यामुळे केकेआर आणि आरसीबी यांच्यातील सामन्याला विलंब होत असेल, तर किमान ५ षटकांच्या खेळाची कट ऑफ वेळ १०.५६ मिनिटे निश्चित करण्यात आली आहे. त्यामुळे या वेळेपर्यंत सामना सुरू झाल्यास निकाल लागू शकतो. जर सामना पावसामुळे रद्द झाला तर दोन्ही संघांना १-१ गुण दिला जाईल.

पावसामुळे शुक्रवारी दोन्ही संघांचा सरावही मैदानावर झाला नसून त्यांना इनडोअर सराव करावा लागला. अशातच आयपीएल २०२५ मधील हा पहिला सामना असल्याने ईडन गार्डन्सवर ओपनिंग सेरेमनी होणार आहे. या ओपनिंग सेरेमनीसाठी बॉलीवूड अभिनेत्री दिशा पटनी, गायिका श्रेया घोषाल, रॅपर करन औजला हे उपस्थित राहणार आहेत. पावसाने हजेरी लावल्यास ओपनिंग सेरेमनीचा कार्यक्रमदेखील उशिराने सुरू होऊ शकतो किंवा रद्द होऊ शकतो.