Jason Roy Fined 10 Percent of Match Fee: आयपीएलच्या २०२३ मधील ३६वा सामना बुधवारी केकेआर आणि आरसीबी संघात खेळला गेला. या सामन्यात केकेआरने आरसीबीचा २१ धावांनी पराभव करून त्यांची पराभवाची मालिका खंडित केली. आरसीबीविरुद्धच्या या विजयाचा हिरो स्टार फलंदाज जेसन रॉय ठरला. मात्र, सामन्यादरम्यान जेसन रॉयकडून मोठी चूक झाली आणि तो आयपीएल आचारसंहिता मोडल्याप्रकरणी दोषी आढळला. त्यामुळे शिक्षा म्हणून जेसन रॉयच्या मॅच फीमध्ये १०% कपात करण्यात आली आहे.
आयपीएलने जारी केलेल्या प्रेस रिलीझमध्ये जेसन रॉयला दंड ठोठावण्यात आल्याची माहिती देण्यात आली आहे. या प्रेस रिलीझमध्ये म्हटले आहे की, “कोलकाता नाइट रायडर्सचा फलंदाज जेसन रॉयला मॅच फीच्या १० टक्के दंड ठोठावण्यात आला आहे.” आयपीएल २०२३ मध्ये रॉयल चॅलेंजर्स बंगळुरु विरुद्ध खेळल्या गेलेल्या सामन्यात आचारसंहिता मोडल्याबद्दल हा दंड ठोठावण्यात आला आहे. रिलीझमध्ये पुढे म्हटले आहे की, “जेसन रॉय कलम २.२अंतर्गत लेव्हल वनमध्ये दोषी आढळला आहे. या चुकीसाठी मॅच फीच्या १० टक्क्यांपर्यंत दंड आकारला जातो. सामनाधिकारी यांचा निर्णय अंतिम असतो.”
जेसन रॉयला दंड ठोठावला –
आयपीएलचे नियम मोडल्याबद्दल रॉय दोषी आढळला आणि त्याच्या मॅच फीच्या १० टक्के दंड ठोठावण्यात आला. त्याने आयपीएल आचारसंहितेच्या २.२ च्या लेव्हल १ चा गुन्हा देखील स्वीकारला आहे. रॉय बाद झाल्यानंतर त्याने गैरवर्तन केले, ज्यासाठी त्याला दंड सुनावला. १०व्या षटकाच्या शेवटच्या चेंडूवर विजयकुमार वैशाखने रॉयला बोल्ड केले, त्यानंतर पॅव्हेलियनमध्ये परतताना रॉयने आपला राग दाखवत बॅट हवेत फेकली. त्यांच्या या वागण्यावर बरीच टीकाही झाली होती.
केकेआरने चार सामन्यांनंतर विजय मिळवला –
मात्र, याआधी जेसन रॉयने शानदार फलंदाजी करताना केकेआरच्या विजयात महत्त्वाची भूमिका बजावली. जेसन रॉयने २९ चेंडूत ५६ धावांची उत्कृष्ट खेळी खेळली. या खेळीमुळे केकेआरने २० षटकांत ५ विकेट गमावून २०० धावांची मोठी धावसंख्या उभारली. या लक्ष्याचा पाठलाग करताना आरसीबी संघाला २० षटकांत केवळ १७९ धावाच करता आल्या.
आरसीबीवर २१ धावांनी विजय मिळवण्यासोबतच केकेआरने सलग चार सामन्यांतील पराभवाची मालिकाही खंडित केली. आयपीएल १६ मधील ८व्या सामन्यातील केकेआरचा हा तिसरा विजय ठरला. या विजयासह केकेआर गुणतालिकेत सातव्या स्थानावर पोहोचला आहे. एवढेच नाही तर केकेआरच्या प्लेऑफमध्ये पोहोचण्याच्या आशाही अबाधित आहेत.