Shashank Singh Roof Top Six Video Viral IPL 2025: धरमशालाच्या नयनरम्य स्टेडियममध्ये आयपीएल २०२५ मधील पहिला सामना खेळवला जात आहे. या सामन्यात पंजाब किंग्सने प्रथम फलंदाजी करताना ५ विकेट्स गमावत तब्बल २३६ धावांचा डोंगर उभारला. संघातील सर्व फलंदाजांनी योगदान देत ही धावसंख्या उभारली. पण यादरम्यान शशांक सिंगने षटकार लगावला. त्याचा हा गगनचुंबी षटकार थेट स्टेडियमच्या छतावर गेला. दरम्यान प्रीती झिंटाच्या प्रतिक्रियेचा व्हीडिओ व्हायरल होत आहे.
पंजाबसाठी फिनिशरची भूमिका शशांक सिंगने इतका जबरदस्त षटकार मारला की संघ मालक प्रीती झिंटा श्वास रोखून पाहत होती. शशांतने चेंडू इतका जोरात मारला की तो स्टेडियमच्या छतावर पडला आणि बाहेर गेला. हा अद्भुत शॉट पाहून प्रीती झिंटा थक्क झाली. तिची प्रतिक्रिया सोशल मीडियावर व्हायरल होत आहे.
१६ व्या षटकातील दुसऱ्या चेंडूवर, पंजाब किंग्जने नेहल वढेराला बाद करत चौथी विकेट गमावली. यानंतर शशांक सिंग फलंदाजीला आला. या षटकात त्याने २ चेंडूत २ धावा काढल्या. यानंतर, त्याने १७ व्या षटकात मयंक यादवविरुद्ध फटकेबाजी करत चौकाराने सुरुवात केली. दुसऱ्या चेंडूवर त्याने २ धावा काढल्या. पण तिसऱ्या चेंडूवर, त्याने डीप बॅकवर्ड स्क्वेअर लेगकडे एक शक्तिशाली फटका खेळला मारला आणि चेंडू स्टेडियमच्या पलीकडे पाठवून षटकार लगावला.
शशांकचा हा दमदार फटका पाहून पंजाब किंग्जच्या मालकीण प्रीती झिंटासह स्टेडियममध्ये उपस्थित असलेले सर्वजण आश्चर्यचकित झाले. शशांक सिंगने पुन्हा एकदा फिनिशरची भूमिका लिलया पार पाडली. या सामन्यात त्याने फक्त १५ चेंडूत २२० च्या स्ट्राईक रेटने ३३ धावा केल्या. यादरम्यान त्यांच्या बॅटमधून ४ चौकार आणि १ षटकार पाहायला मिळाला. याबरोबरच, त्याने आतापर्यंत ११ सामन्यांच्या ९ डावात ५२ च्या सरासरीने २१० धावा केल्या आहेत. यादरम्यान त्याचा स्ट्राइक रेट १४० राहिला आहे.
शशांक सिंग व्यतिरिक्त, या सामन्यात प्रभसिमरन सिंगने १८९ च्या स्ट्राईक रेटने ४८ चेंडूत ९१ धावा केल्या. तर कर्णधार श्रेयस अय्यरने २५ चेंडूत ४५ धावांची स्फोटक खेळी केली. त्याच्याशिवाय, जोश इंगलिसने १४ चेंडूत झटपट ३० धावा केल्या आणि पॉवरप्लेमध्ये चांगली सुरूवात करून दिली. तर नेहल वढेराने ९ चेंडूत १६ आणि मार्कस स्टॉइनिसने ५ चेंडूत १५ धावांचे योगदान दिले. यासह प्रथम फलंदाजी करणाऱ्या पंजाब संघाने २० षटकांत लखनौ सुपर जायंट्ससमोर २३७ धावांचे मोठे लक्ष्य ठेवले.