SRH vs KKR: कोलकाताचा IPL इतिहासातील सर्वात मोठा पराभव, रौद्ररूप घेतलेल्या हैदराबादची विजयाने सांगता

SRH vs KKR Highlights in Marathi: सनरायझर्स हैदराबादने आयपीएल २०२५च्या इतिहासातील तिसरी सर्वात मोठी धावसंख्या उभारत केकेआरचा मोठा पराभव केला आहे. हैदराबादच्या फलंदाजांनी यंदाच्या मोसमातील अखेरच्या सामन्यात रौद्र रूप धारण करत धावांचा पाऊस पाडला. ट्रॅव्हिस हेड- अभिषेकची सुरूवात आणि हेनरिक क्लासेनच्या शतकासह २७८ धावांचा डोंगर उभारला आणि केकेआरचा ११० धावांनी मोठा विजय नोंदवला.

आयपीएलच्या इतिहासातील ३ वेळचा चॅम्पियन संघ असलेल्या कोलकाता नाईट रायडर्स संघाचा हा धावांच्या अनुषंगाने सर्वात मोठा पराभव आहे. आयपीएल २०२५ चा हंगाम या दोन्ही संघांसाठी खूप वाईट होता, आयपीएलच्या गेल्या हंगामातील विजेते आणि उपविजेते असलेले हे संघ प्लेऑफच्या शर्यतीतून बाहेर पडले होते. पण हंगामाच्या शेवटच्या सामन्यात, सनरायझर्सने त्यांची पूर्ण ताकद दाखवली आणि गेल्या हंगामातील विजेत्या कोलकात्याला ११० धावांनी पराभव केला.

दोन्ही संघांसाठी, हंगामाची सुरुवात ज्या पद्धतीने झाली त्याच पद्धतीने सांगता झाली. कोलकाता संघाला हंगामातील पहिल्याच सामन्यात दारुण पराभव पत्करावा लागला होता. आणि शेवटच्या सामन्यातही या संघाला मोठ्या पराभवाला सामोरे जावे लागले. दुसरीकडे, सनरायझर्सने आयपीएल २०२५ मध्ये त्यांच्या पहिल्याच सामन्यात २८६ धावांचा डोंगर उभारला होता. त्या सामन्यात इशान किशनने शानदार शतक झळकावले होते आणि संघाला मोठा विजय मिळाला होता. आता त्यांच्या शेवटच्या सामन्यातही सनरायझर्सने २७८ धावांची मोठी धावसंख्या उभारली, ज्यामध्ये हेनरिक क्लासेनचे वादळी शतक होते आणि नंतर मोठा विजय मिळवला.

सनरायझर्सने या सामन्यात प्रथम फलंदाजी केली आणि ट्रॅव्हिस हेडने अभिषेक शर्मासह केवळ ७ षटकांत ९२ धावांची भागीदारी रचली. यानंतर, हेड आणि क्लासेन यांनी कोलकाताच्या गोलंदाजांची धुलाई केली. दोघांनी मिळून ८३ धावा जोडल्या आणि १३ व्या षटकापर्यंत संघाने १७५ धावा केल्या. क्लासेनची वादळी खेळी पाहायला मिळाली, क्लासेनने प्रथम फक्त १७ चेंडूत आपले अर्धशतक पूर्ण केले आणि नंतर ३७ व्या चेंडूत आपले शतक पूर्ण केले. हैदराबादने २० षटकांत ३ गडी गमावून २७८ धावा केल्या, जी आयपीएलच्या इतिहासातील तिसरी सर्वोच्च धावसंख्या आहे.

प्रत्युत्तरात केकेआरचा संपूर्ण संघ १६८ धावांमध्ये सर्वबाद झाला. सुनील नरेनने चांगली सुरूवात केली. पण तो लवकर बाद झाला. यानंतर मनीष पांडे आणि हर्षित राणा यांनी अर्धशतकी भागीदारी केली संघाला २०० अधिक धावांपेक्षा पराभवापासून वाचवलं. मनीष पांडेने २३ चेंडूत २ चौकार आणि ३ षटकारांसह ३७ धावा केल्या. तर हर्षित राणाने २१ चेंडूत २ चौकार आणि ३ षटकारांसह ३४ धावा केल्या. तर रमणदीप सिंग ५ चेंडूत १३ धावा करत बाद झाला. याशिवाय केकेआरचे इतर सर्व फलंदाज फेल ठरले. हैदराबादकडून हर्ष दुबे, इशान मलिंगा आणि जयदेव उनाडकट यांनी प्रत्येकी ३-३ विकेट घेतले.