सानिया कारकीर्दीतील दुहेरीच्या रौप्यमहोत्सवी अंतिम फेरीत

न्यू हेवन खुल्या टेनिस स्पर्धेच्या दुहेरीच्या अंतिम फेरीत धडक मारत सानिया मिर्झाने शिरपेचात मानाचा तुरा खोवला. दुहेरी प्रकारातील सानियाची ही रौप्यमहोत्सवी अंतिम लढत असून, यापैकी १६ लढतींत तिने जेतेपदावर कब्जा केला आहे. नवीन साथीदार चीनच्या जी झेंगच्या साथीने खेळताना सानियाने अंतिम फेरीत आगेकूच केली.
तृतीय मानांकित सानिया-झेंग जोडीने स्पेनच्या सिल्व्हिया सोलर-इस्पिनोसा-कार्ला सुआरेझ जोडीवर ६-३, ६-३ अशी मात केली. लिझेल ह्य़ुबेर-नुरिया लागोस्टेरा व्हाइव्हस आणि अनाबेल मेडिना गॅरिग्युस-कतरिना स्त्रेबोटनिक यांच्यातील विजेत्या जोडीशी सानिया-झेंग जोडीचा मुकाबला होणार आहे. यंदाच्या हंगामात अंतिम फेरीत खेळण्याची सानियाची ही चौथी वेळ आहे. सानियाने यंदाच्या हंगामात दोन जेतेपदांची कमाई केली आहे. अमेरिकेच्या बेथानी मॅटेक सँण्ड्सच्या साथीने खेळताना सानियाने ही जेतेपदे पटकावली आहेत.