IND vs ENG: हर्षित राणाला शिवम दुबेच्या जागी कनक्शन सबस्टिट्यूट म्हणून गोलंदाजीची परवानगी कशी मिळाली? काय सांगतो ICC चा नियम

हर्षित राणा भारताचा अष्टपैलू खेळाडू शिवम दुबे याच्या जागी पुण्यातील टी-२० सामन्यात कनक्शन सबस्टिट्यूट म्हणून मैदानावर उतरला. ८व्या षटकात मैदानावर आल्यावर राणाने लगेचच आपली उपस्थिती दाखवली ती म्हणजे इंग्लंडचा कर्णधार जोस बटलरचा झेल घेतला. त्यानंतर त्याने पहिल्याच षटकात विकेट घेत सर्वांचं लक्ष वेधलं. ऑस्ट्रेलियाविरूद्ध कसोटी पदार्पणानंतर शिवम दुबेला टी-२० मध्येही पदार्पणाची संधी मिळाली आहे.

राणाने आपल्या स्पेलमधील पहिल्याच षटकात लिव्हिंस्टोनला बाद केल्यानंतर १६व्या षटकात त्याने जेकब बेथेलला अवघ्या ६ धावांवर माघारी धाडले. त्याने जेमी ओव्हरटनला १९ धावांवर बाद करून ४ षटकांत ३३ धावा देत ३ विकेट्स घेतले. हर्षित राणाच्या या आगळ्यावेगळ्या टी-२० पदार्पणाबद्दल वाद निर्माण झाला. एका अष्टपैलू खेळाडूच्या जागी वेगवान गोलंदाजाला संधी देण्याबाबत तज्ज्ञांनी प्रश्न उपस्थित केले.

हर्षित राणाच्या कनक्शन सबस्टीट्यूटबाबत काय आहे ICC नियम?

आयसीसीच्या खेळण्याच्या नियम १.२.७.३ कनक्शन झाल्यास सबस्टिट्यूटच्या नियमाबद्दल सांगतो की, “सामन्यादरम्यान कनक्शन झालेल्या खेळाडूच्या जागी येणारा बदली खेळाडू जर त्याच्यासारखाच असेल आणि त्याच्या समावेशामुळे त्याच्या संघाला उर्वरित कालावधीसाठी जास्त फायदा होणार नाही, तर ICC मॅच रेफ्रीने सामान्यत: कनक्शन रिप्लेसमेंट रिक्वेस्टला मान्यता दिली पाहिजे.

नियम १.२.७.७ नुसार “कोणत्याही कनक्शन रिप्लेसमेंट विनंतीसंदर्भात ICC मॅच रेफ्रीचा निर्णय अंतिम असेल आणि कोणत्याही संघाला अपील करण्याचा अधिकार नसेल.”

२०२० मध्येही भारताला सारख्याच परिस्थितीचा सामना करावा लागला होता. ऑस्ट्रेलियाविरुद्धच्या टी-२० सामन्यात युझवेंद्र चहल रवींद्र जडेजाचा बदली खेळाडू म्हणून मैदानात उतरला आणि तीन विकेट्स घेत तो सामनावीर ठरला.