Skin Cancer Symptoms Nails: जेव्हा शरीर आतून अस्वस्थ असतं, तेव्हा बाहेरून त्याचे काही संकेत दिसू लागतात. हे वेळेवर ओळखणे खूप गरजेचे आहे. लोक कायम आपली नखं कापणे, ती साफ ठेवणे याकडे लक्ष देतात. पण, तुम्हाला माहीत आहे का, नखं पाहिल्यावर गंभीर आजार कळतात? डॉक्टर्स सांगतात की, नखं शरीराच्या आतल्या आरोग्याचे प्रतिबिंब दाखवतात. नखांमध्ये होणारे छोटे बदल कधी कधी मोठ्या आजारांची सुरुवातीची लक्षणे असतात. अभ्यासानुसार, नखांची तपासणी करून रक्ताल्पता (अॅनिमिया), फुफ्फुस आणि हृदयाचे आजार, यकृताची समस्या, संसर्ग आणि कॅन्सर यांची माहिती मिळू शकते.
मेट्रो हॉस्पिटल, नोएडा येथील त्वचारोग विभागाच्या वरिष्ठ डॉक्टर डॉ. आलिया अब्बास रिजवी यांनी सांगितले की नखांवर दिसणारे डाग वेगवेगळ्या आजारांचे संकेत असू शकतात. तज्ज्ञांच्या मते, नखांची नियमित काळजी आणि तपासणी हा शरीरातील अनेक आजार लवकर ओळखण्याचा सोपा, जलद आणि वेदनारहित मार्ग आहे. नखांमधून रक्ताल्पता (अॅनिमिया), दीर्घकालीन फुफ्फुसाचे आजार, हृदय-फुफ्फुसाशी संबंधित समस्या, यकृताचे आजार आणि मेलानोमासारख्या त्वचेच्या कॅन्सरची सुरुवातीची लक्षण ओळखता येतात.
नखांवर रेघा
नखांवर आडव्या खोल रेषा किंवा खळग्यासारख्या रेघा दिसल्या तर त्यांना ब्यूज लाईन्स म्हणतात. या तेव्हा येतात, जेव्हा शरीरावर मोठा ताण येतो. जसे की जास्त ताप, मोठी शस्त्रक्रिया किंवा गंभीर आजार. जर अशा रेघा अलीकडच्या आजाराशिवाय दिसल्या तर डॉक्टरांकडे तपासणी करणे गरजेचे आहे. क्यूजेएम: इंटरनॅशनल जर्नल ऑफ मेडिसिनमध्ये २०१७ मध्ये छापलेल्या एका अभ्यासानुसार, ब्यूज लाईन्स या शरीरावर झालेल्या मोठ्या ताणानंतर नखांच्या वाढीत तात्पुरता अडथळा दर्शवतात.
चमच्यासारखे नखे (स्पून नेल्स)
नखं वरच्या बाजूला वाकलेली आणि खोकी दिसली तर त्याला स्पून नेल्स म्हणतात. हे बहुतेक वेळा रक्तात लोह कमी असल्याचं लक्षण असतं. साध्या रक्त तपासणीतून याची खात्री करता येते. स्टेटपर्ल्समध्ये २०२३ मध्ये छापलेल्या अभ्यासानुसार, कोइलोनीचिया हे लोहाच्या कमतरतेमुळे होणाऱ्या अॅनिमिया किंवा इतर मोठ्या आजाराचं लक्षण असू शकतं.
पिवळी आणि जाड नखे
हळूहळू वाढणारी, जाड आणि पिवळी नखं नेहमीच फंगल इन्फेक्शनमुळे होत नाहीत. यासोबत पाय सुजणे, खोकला किंवा श्वास घेण्यास त्रास होत असेल तर ते यलो नेल सिंड्रोम असू शकतं. ही स्थिती लिम्फॅटिक सिस्टीम आणि श्वसनाच्या आजारांशी जोडलेली असते. ऑर्फनेट जर्नल ऑफ रेअर डिसीजेसमध्ये २०१७ मध्ये प्रकाशित केलेल्या एका आढाव्यात, पिवळ्या नखांसोबत लिम्फेडेमा आणि श्वसन रोग असल्याचं वर्णन आहे.
जाड आणि तुटणारी नखं
नखं जाड, भुरभुरीत आणि पिवळ्या, तपकिरी किंवा पांढऱ्या रंगाची झाली तर ते बहुतेकदा फंगल इन्फेक्शनचं लक्षण असतं. ही समस्या जास्त करून पायाच्या नखांत दिसते. ही आपोआप बरी होत नाही, त्यामुळे डॉक्टरांकडून औषध आणि उपचार घेणे गरजेचे आहे. जर्नल ऑफ फंगीमध्ये २०२० मध्ये छापलेल्या आढाव्यात संशोधकांनी सांगितलं आहे की, फंगल नखांवर उपचार न केल्यास दुखणे, इन्फेक्शन आणि हालचालीत अडथळा होऊ शकतो.
लाल-तपकिरी बारीक डाग
नखांच्या खाली बारीक लाल किंवा तपकिरी रेघा दिसल्या तर त्याला स्प्लिंटर हॅमरेज म्हणतात. हे साध्या दुखापतीमुळे होऊ शकतं, पण जर अशा अनेक रेघा दिसल्या तर ते हृदयाचं इन्फेक्शन (एंडोकार्डायटिस) किंवा रक्तवाहिन्यांच्या आजाराचं लक्षण असू शकतं. यासोबत ताप किंवा थकवा असेल तर लगेच डॉक्टरांना दाखवावं.