अहिल्यानगर : दिवंगत आमदार शिवाजीराव कर्डिले यांना श्रद्धांजली वाहण्यासाठी आज गुरुवारी आयोजित शोकसभेत जिल्ह्यातील नेत्यांसह भाजपच्या सर्व आमदारांनी कर्डिले यांचे चिरंजीव अक्षय कर्डिले यांच्यामागे भक्कमपणे उभे राहणार असल्याचा निर्धार व्यक्त करत कर्डिले यांच्या आठवणींना उजाळा दिला.
सहकार सभागृहात स्व. कर्डिले यांच्या श्रद्धांजली सभेचे आयोजन करण्यात आले होते. यावेळी विधानसभेचे सभापती प्रा. राम शिंदे, आमदार संग्राम जगताप, आमदार मोनिका राजळे, आमदार आशुतोष काळे, आमदार विक्रम पाचपुते, आमदार विठ्ठलराव लंघे, अमोल खताळ, आमदार काशिनाथ दाते, आदर्शगाव योजनेचे कार्याध्यक्ष पोपटराव पवार, जिल्हा बँकेचे उपाध्यक्ष माधवराव कानवडे, ज्येष्ठ संचालक अण्णासाहेब म्हस्के, भानुदास मुरकुटे, चंद्रशेखर घुले, बबनराव पाचपुते, रा. स्व. संघाचे वाल्मीक कुलकर्णी, जिल्हा बँकेचे मुख्य कार्यकारी अधिकारी रावसाहेब वर्पे यांच्यासह विविध संस्था, संघटनांचे पदाधिकारी उपस्थित होते.
सभापती राम शिंदे म्हणाले, अहिल्यानगर जिल्हा हा संस्थानिक व प्रस्थापितांचा जिल्हा असून, या ठिकाणी कर्डिले यांनी प्रत्येकवेळी वेगवेगळी राजकीय समीकरणे असताना ६ वेळा निवडून येण्याची किमया साधली. त्यांनी जिल्हा बँकेत प्रवेश केल्यानंतर ही बँक खऱ्या अर्थाने साखर कारखानदारांसोबत शेतकऱ्यांची व दूध उत्पादकांची असल्याचे त्यांच्या कामातून दाखवून दिले. कर्डिले हे सातत्याने लोकांमध्ये राहणारे नेते होते. यापुढे अक्षय कर्डिले यांच्यामागे खंबीरपणे उभे राहण्याची गरज आहे. अक्षय कर्डिले यांनी देखील जबाबदारी स्वीकारून पुढे जाण्याची वेळ आली आहे.
यावेळी आमदार दाते, आमदार खताळ, आमदार काळे, आमदार मोनिका राजळे, सदाशिव लोखंडे, जिल्हा बँकेचे मुख्य कार्यकारी अधिकारी रावसाहेब वर्पे यांच्यासह पदाधिकाऱ्यांनी कर्डिले यांच्या आठवणींना उजाळा दिला.