लोकसत्ता प्रतिनिधी
सांगली : जिल्ह्यातील कायदा व सुव्यवस्था बिघडली असून दिवसाढवळ्या दरोडे, लूट, खून यासारख्या गंभीर घटना घडत आहेत. नशेच्या गोळ्यांची विक्रीसह अवैध व्यवसाय जोमाने सुरु आहेत. गुन्हेगारावर वचक ठेवण्यात पोलीस विभाग कुचकामी ठरत असून समाजकंटकांना पाठीशी घालणाऱ्या अधिकाऱ्यांची चौकशी करुन कठोर कारवाई करावी अशी मागणी आ. सुधीर गाडगीळ यांनी उपमुख्यमंत्री तथा गृहमंत्री देवेंद्र फडणवीस यांच्याकडे केली.
दोन दिवसापूर्वी पोलीस अधिक्षक कार्यालयापासून हाकेच्या अंतरावर असलेल्या रिलायन्स ज्वेल्स या दुकानावर पिस्तुलाचा धाक दाखवत १४ कोटींची लूट झाली. महिलांचे दागिने लंपास करण्याचे प्रकार रोज घडत आहेत. महिलावरील अत्याचारात वाढ झाली आहे. नशेबाज तरुण राजरोसपणे सामान्यांना धमकावून, प्रसंगी मारहाण करुन लुटत आहेत. गंभीर प्रकार घडूनही पोलीस यंत्रणा सुस्त असून कायद्याचा गुन्हेगारांवर वचक राहिला नाही. तातडीने याची दखल घेऊन दोषी अधिकाऱ्यांवर कारवाई करण्यात यावी असे निवेदन आ. गाडगीळ यांनी उपमुख्यमंत्री फडणवीस यांना मंगळवारी दिले. याची दखल घेत फडणवीस यांनी चौकशी करुन कारवाई करण्याचे आश्वासन आ. गाडगीळ यांना दिले.