पंढरपूर : कुंकू बुक्क्यासह लाह्याची उधळण करीत हजारो भक्तांच्या उपस्थितीत महाद्वार काल्याचा उत्सव मोठ्या उत्साहात साजरा करण्यात आला. यावेळी परंपरेने दहीहंडी फोडून भाविकांना काल्याचा प्रसाद वाटण्यात आला. दरम्यान, या काल्याने आता आषाढी यात्रेची सांगता झाली आहे.
पंढरीत अनेक संतांच्या विविध परंपरा असून, यामध्ये महाद्वार काल्याचा देखील समावेश आहे. येथील हरिदास घराण्यात जवळपास चारशे वर्षांपूर्वी होऊन गेलेल्या संत पांडुरंग महाराज यांना प्रत्यक्ष विठ्ठलाने आपल्या खडावा अर्थात पादुका दिल्याची अख्यायिका आहे. तेव्हापासून या घराण्यात या खडावा डोक्यावर घेवून काला करण्याची परंपरा आहे. या परंपरेनुसार दुपारी बारा वाजता संत नामदेव महाराजांचे वंशज येथील काल्याच्या वाड्यात दिंडी घेवून आले. येथून हा उत्सव श्री विठ्ठल रुक्मिणी मंदिरात दाखल झाला.
सभामंडप येथे काल्याचे मानकरी ह.भ.प.मदन महाराज हरिदास यांना खांद्यावर घेवून पाच प्रदक्षिणा पूर्ण करण्यात आल्या. यानंतर अनिल महाराज हरिदास यांनी काल्याचा अभंग म्हणून दहीहंडी फोडली व हंडीतील काला भाविकांना वाटला. या वेळी गोपाळकाला गोड झाला, गोपाळाने गोड केला, असा गजर झाला.
मंदिरातून हा सोहळा घाटावरून चंद्रभागा नदीवर गेला. येथे नदीचे पाणी पादुकांवर अर्पण करण्यात आले. यानंतर कुंभार घाटमार्गे माहेश्वरी धर्मशाळा, आराध्ये गल्ली, हरिदास वेस येथे दहीहंडी फोडून हा सोहळा काल्याच्या वाड्यात विसावला. येथे भाविकांना काल्याचा प्रसाद वाटण्यात आला आणि आषाढी वारीची सांगता झाली. या काल्यासाठी वारकरी पंढरीत थांबतात.