रत्नागिरी – गोल्ड ट्रेडिंग करुन कमी वेळात जास्त नफ्याचे आमिष दाखवून ११ लाख ६० हजार रुपयांची ऑनलाईन फसवणूक झाल्याचे उघडकीस आले आहे. याप्रकरणी रत्नागिरी सायबर पोलीस ठाण्यात गुन्हा दाखल करण्यात आला आहे. ही घटना ४ जुलै २०२५ ते २१ ऑगस्ट २०२५ या कालावधीत घडल्याचे सांगितले जात आहे.
मिळालेल्या माहितीनुसार, याप्रकरणी मारिया कंपनीची प्रतिनिधी मारिया (पूर्ण नाव गाव माहिती नाही) आणि या कंपनीच्या सर्व खातेदारांवर रत्नागिरी सायबर पोलीस ठाण्यात गुन्हा दाखल करण्यात आला आहे. फिर्यादीची संशयित महिला मारिया हिच्याशी फेसबुकवर ओळख झाली होती. तिने फिर्यादीचा विश्वास संपादन करुन आपण ट्रेडिंग संदर्भातील सल्लागार असल्याचे भासवले. त्यानंतर गोल्ड ट्रेडिंग करुन कमी वेळात जास्त नफ्याचे आमिष दाखवून तीने फिर्यादीला व्हॉटसअॅपव्दारे लिंक पाठवून ट्रेडबेड हे अॅप्लिकेशन मोबाईलमध्ये इंस्टॉल करण्यास सांगितले.
त्यानंतर फिर्यादीची दिशाभूल करुन पैसे गुंतवण्यास भाग पाडले. तसेच गुंतवणूकीचा लाभ न देता मुळ गुंतवणूकीच्या रक्कमेची फिर्यादीने विचारणा केल्यावर कंपनीच्या नियमाप्रमाणे ६ लाख १३ हजार ६४७ रुपये इतकी रक्कम तुम्हाला भरावी लागेल आणि मनी लॉड्रिंग झाल्यामुळे खाते बंद झाले असल्यामुळे सर्व रक्कम भरावी लागेल असे फिर्यादिला सांगितले.
तिच्या बोलण्यावर विश्वास ठेवून फिर्यादीने पैसे भरुनही त्यांना गुंतवणूक केलेल्या रक्कमेवर कोणताही लाभांश न मिळाल्याने आपली फसवणूक झाल्याचे लक्षात येताच फिर्यादीने रत्नागिरी सायबर पोलीस ठाण्यात धाव घेत तक्रार दिली. तक्रारीवरुन पोलिसांनी संशयितांविरोधात भारतीय न्यायसंहिता अधिनियम २०२३ चे कलम ३१८(४), ३१९ (२) माहिती तंत्रज्ञान अधिनियम २००० चे कलम ६६ (सी), प्रमाणे गुन्हा दाखल करण्यात आला असून पोलीस अधिक तपास करीत आहेत.