राहाता : शिर्डीतील ग्रो मोअर कंपनीचा मुख्य सूत्रधार भूपेंद्र राजाराम सावळे याच्याविरुद्ध आर्थिक गैरव्यवहार प्रकरणी राहाता पोलीस ठाण्यात दाखल गुन्ह्याचे सुमारे एक हजार पानी दोषारोपपत्र आर्थिक गुन्हे शाखेने न्यायालयात दाखल केले. ‘मनीट्रेल’ अहवालानुसार या संपूर्ण घोटाळ्यात ७२३ कोटी रुपयांचा आर्थिक गैरव्यवहार झाल्याचे निष्पन्न झाले. गुंतवणूकदारांना दरमहा चांगला परतावा देण्याचे आमिष दाखवत फसवणूक केल्याचा आरोप आहे.

सावळे आणि त्याच्या साथीदारांनी गुंतवणूकदारांना दरमहा १० ते १५ टक्के परतावा देण्याचे आमिष दाखवले. त्यामुळे अनेकांनी गुंतवणूक केली; मात्र ठरलेला परतावा आणि मूळ गुंतवणूक न देता सर्वांची फसवणूक करण्यात आली. सुरुवातीला राहाता, त्यानंतर शिर्डी पोलीस ठाण्यात दोन स्वतंत्र गुन्हे दाखल करण्यात आले. या दोन्ही गुन्ह्यांचा एकत्रित तपास आर्थिक गुन्हे शाखेचे सहायक पोलीस निरीक्षक युवराज आठरे यांच्याकडे सोपवण्यात आला.

दि. १६ जुलै २०२५ रोजी मुख्य सूत्रधार भूपेंद्र सावळे याला अटक करण्यात आली. पोलीस कोठडीत चौकशीतून सावळे आणि त्याच्या सहकाऱ्यांनी ग्रो मोअर या नावाने ग्रो मोअर इन्व्हेस्टमेंट फायनान्स, ग्रो मोअर फिनकेअर सर्व्हिसेस, ग्रो मोअर इन्व्हेस्टमेंट, ग्रो मोअर स्वराज्य कॅपिटल अशा विविध कंपन्या स्थापन केल्या. या कंपन्यांना परवानगी नसताना नागरिकांकडून कोट्यवधी रुपयांच्या ठेवी स्वीकारण्यात आल्या. त्यांना परतावा दिला गेला नाही व गुंतवणुकीची रक्कम देखील परत मिळाली नाही.

हेही वाचा

पोलिसांनी गुंतवणूकदारांचे जबाब नोंदवून, पुरावे गोळा करून, भूपेंद्र सावळे विरोधात राहाता येथील एमपीआयडी विशेष न्यायालयात दोषारोपपत्र दाखल केले. फरार संशयितांच्या विरोधातही पुरवणी दोषारोपपत्र दाखल करण्यात येणार आहे. तसेच तपासादरम्यान नवीन संशयित आरोपींचा सहभाग निष्पन्न झाल्यास त्यांच्याविरोधातही कारवाई होणार असल्याचे पोलिसांनी सांगितले. दरम्यान, शिर्डी पोलीस ठाण्यातील गुन्ह्यात स्वतंत्र दोषारोपपत्र दाखल केले जाणार आहे.

इतर आरोपी अद्याप फरारच

गुन्ह्यात मुख्य सूत्रधार भूपेंद्र सावळे अटकेत असला तरी त्याचा भाऊ, वडील यांच्यासह इतर ६ संशयित आरोपी अद्याप पसार आहेत. त्यामध्ये संदीप भास्कर सावळे, राजाराम भटू सावळे (दोघे रा. श्रीकृष्णनगर, शिर्डी), भाऊसाहेब आनंदराव थोरात (रा. राहाता), सुबोध सुकदेव पाटील (रा. साईप्रसादनगर, शिर्डी), तसेच अरूण रामदास नंदन आणि सीमा अरूण नंदन (दोघे रा. नाशिक) यांचा समावेश आहे. त्यांना शोधण्यात आर्थिक गुन्हे शाखेला अद्यापही यश मिळाले नसल्याने गुंतवणूकदार नाराजी व्यक्त करत आहेत. गुन्हा दाखल झाल्यानंतरही शिर्डी परिसरात संशयीत फिरत होते, असा आरोप गुंतवणूकदारांनी केला आहे.