दसऱ्याच्या मुहूर्तावर छत्रपती शिवाजी महाराजांचे तेरावे वंशज खासदार उदयनराजे भोसले यांनी किल्ले प्रतापगडावर जाऊन भवानी मातेचं दर्शन घेतलं. नवरात्रोत्सवानिमित उदयनराजे भोसले यांच्या हस्ते प्रतापगडावर भवानीमातेची पूजा पारंपरिक व विधिवत पद्धतीने करण्यात आली. दरवर्षी नवरात्रोत्सवात प्रतापगडावर उदयनराजे सहकुटुंब भवानीमातेची पूजा करतात.
दरम्यान, उदयनराजेंच्या हस्ते भवानी मातेची आरती घेण्यात आली. यावेळी शिवभक्तांनी गडावर मोठी गर्दी केली होती. सकाळी उदयनराजे भोसले हे गडावर आले तेव्हा त्यांचं स्वागत तुतारीच्या निनादात करण्यात आले. उदयनराजेंच्या हस्ते पूजा झाल्यानंतर त्यांनी प्रसार माध्यमांशी बोलताना पूरग्रस्तांना आर्थिक संकटातून सावरण्याचे बळ मिळावे असे साकडे भवानी मातेला घातल्याचे त्यांनी सांगितले.
उदयनराजे पुढे म्हणाले, महाराष्ट्रात यंदा पावसाने मोठा धुमाकूळ घातला आहे त्यामुळे पश्चिम महाराष्ट्र मराठवाडा तसेच महाराष्ट्राच्या इतर भागांमध्ये मोठ्या प्रमाणावर अतिवृष्टीने नुकसान झाले आहे. या पूरग्रस्तांना मदत करणे ही सर्वांची जबाबदारी आहे त्यामुळेच आम्ही यंदाचा साताऱ्याचा शाही दसरा साधेपणाने साजरा करण्याचे ठरवले असून आम्ही यथाशक्ती मदत करणार आहोत. तसेच सर्वांनीच पूरग्रस्तांना जगण्याचे बळ देऊन त्यांना सढळ हाताने मदत करावी, असे आवाहन उदयनराजे यांनी यावेळी केले.
यावेळी उदयनराजेंनी पूरग्रस्त लोकांना आपत्तीपासून वाचायचं असेल तर सरकारने मदतीची प्रक्रिया सुरू केली आहे, तसेच आपणही सर्वांनी त्यांना सढळ हाताने मदत करण्याचा सल्ला दिला. गेल्या काही दिवसांपासून संपूर्ण देशभरात आणि विशेषकरून राज्यात पावसाने थैमान घातले आहे. अनेक ठिकाणी जीवित आणि मोठ्या प्रमाणात वित्तहानी झाली आहे. पशुधनाचेही मोठे नुकसान झाले आहे. बळीराजा शेतकरी तर उदध्वस्त झाला आहे. शहरी तसेच ग्रामीण भागात मोठ्या प्रमाणात नुकसान झाले आहे.
एकंदरीत जनजीवन पूर्णपणे विस्कळीत झाले आहे. अशा परिस्थितीत सातारचा शाही विजयादशमी आणि सीमोल्लंघन सोहळा थाटामाटात, धूमधडाक्यात, डामडौलात करणे हे किमान आमच्या मनाला पटणारे नाही. पावसामुळे मराठवाड्यासह राज्यात हाहाकार असताना त्याठिकाणी मोठ्या मदतीची गरज आहे. त्यामुळे शाही दसरा अत्यंत साधेपणाने साजरा करण्याचा निर्णय घेण्यात आला आहे. जनतेने देखील पूरग्रस्तांसाठी पैसे, धान्य, वस्तू रूपामध्ये जमेल तशी सढळ हाताने मदत करावी. ही मदत जिल्हाधिकारी कार्यालयातील आपत्ती व्यवस्थापन कक्षातील मुख्यमंत्री पूरग्रस्त साहाय्यता निधीमध्ये जमा करता येईल, असे आवाहन उदयनराजे यांनी केले आहे.