‘स्वातंत्र्य वीर सावरकर’ चित्रपट २२ मार्च रोजी हिंदी व मराठी दोन भाषांमध्ये प्रदर्शित झाला. या चित्रपटाला बॉक्स ऑफिसवर २० दिवस पूर्ण झाले आहेत. २० दिवसात या चित्रपटाने समाधानकारक कामगिरी केली आहे. चित्रपटाच्या बॉक्स ऑफिस कलेक्शनची आकडेवारी समोर आली आहे, त्यानुसार त्याने २० कोटींहून जास्त कमाई केली आहे. अशातच या चित्रपटाचं बजेट किती आहे, त्याबाबत जाणून घेऊयात.
‘स्वातंत्र्य वीर सावरकर’ या चित्रपटात रणदीप हुड्डाने मुख्य भूमिका साकारली असून दिग्दर्शनही त्यानेच केलं आहे. वीर सावरकर यांचा जीवन प्रवास सांगणारा ‘स्वातंत्र्य वीर सावरकर’ हा सिनेमा तयार करण्यासाठी आपल्याला वडिलांची मालमत्ता विकावी लागली, असं रणदीप मुलाखतीत म्हणाला होता. वडिलांनी मुंबईत घेतलेली मालमत्ता विकून या चित्रपटाची निर्मिती केली, असं रणदीपने सांगितलं. त्याच्या या विधानाची व चित्रपटाची खूप चर्चा आहे, अशातच चित्रपटाचं बजेट किती? असा प्रश्न अनेकांना पडत आहे.
‘स्वातंत्र्य वीर सावरकर’ चित्रपट प्रदर्शित होऊन २० दिवस पूर्ण, एकूण कलेक्शन किती? जाणून घ्या
‘स्वातंत्र्य वीर सावरकर’ या चित्रपटासाठी रणदीप हुड्डा व इतर निर्मात्यांनी मिळून २० कोटी रुपयांचा खर्च केला आहे. ‘टाइम्स ऑफ इंडिया’ च्या वृत्तानुसार, या चित्रपटाचं बजेट २० कोटी रुपये आहे आणि बॉक्स ऑफिसवर या सिनेमाने तीन आठवड्यांत २१.९ कोटी रुपयांची कमाई केली आहे, यासंदर्भात इंडस्ट्री ट्रॅकर ‘सॅकनिल्क’ने वृत्त दिलं आहे.
‘स्वातंत्र्य वीर सावरकर’ या चित्रपटाचं एकूण बॉक्स ऑफिस कलेक्शन पाहता निर्मात्यांनी खर्च केलेली रक्कम तरी नक्कीच वसूल केली आहे. चित्रपट अजूनही काही ठिकाणी सिनेमागृहांमध्ये दाखवला जात आहे. त्यामुळे चित्रपटाच्या एकूण कलेक्शनमध्ये वाढ होऊ शकते. या चित्रपटात रणदीप हुड्डासह अंकिता लोखंडे व अमित सियाल यांच्या महत्त्वाच्या भूमिका आहेत.