जिओ स्टुडिओज या ओटीटी वाहिनीवर मराठी चित्रपटांच्या डिजिटल वल्र्ड प्रीमियरची सुरुवात ‘मी वसंतराव’ या राष्ट्रीय पुरस्कारप्राप्त चित्रपटाने होणार आहे. २१ मे रोजी जिओ सिनेमावर प्रेक्षकांना हा चित्रपट पाहता येणार आहे. भारतासह जगभरातून या चित्रपटाला प्रेक्षकांकडून सकारात्मक दाद मिळाली होती. तसेच, ९५ व्या ऑस्करसाठी जगभरातील ३०१ चित्रपटांची वेगळी यादी जाहीर केली होती, त्यातही ‘मी वसंतराव’  या चित्रपटाचाही समावेश होता. चित्रपटगृहात प्रेक्षकांची मने जिंकणारा ‘मी वसंतराव’ चित्रपट ओटीटी वाहिनीवरून जगभरातील प्रेक्षक पाहू शकणार असल्याचा आनंद प्रसिद्ध गायक – अभिनेते राहुल देशपांडे यांनी व्यक्त केला. तसेच, या कामाची दखल जागतिक पातळीवर घेत जिओच्या मराठी चित्रपटांच्या प्रदर्शनाच्या मालिकेत ‘मी वसंतराव’ चित्रपटाची प्रथम निवड केल्याबद्दल जिओचे देशपांडेंनी आभारदेखील मानले. 

आर्काइव्हमधील सर्व बातम्या मोफत वाचण्यासाठी कृपया रजिस्टर करा

काही महिन्यांपूर्वी जिओ स्टुडिओजने देशभरातील प्रादेशिक वाहिन्यांना बळकटी देण्यासाठी नव्या पिढीचे प्रतिनिधित्व करणारे चित्रपट, नव्या विषयाच्या व धाटणीच्या वेब मालिका, आणि मनाला भिडणाऱ्या अप्रतिम कथा यांचा समावेश करत प्रेक्षकांच्या भेटीला चित्रपट आणणार असल्याचे जाहीर केले होते. भारतातील प्रत्येक भाषा, संस्कृती यांची गोष्ट मनोरंजनाच्या माध्यमातून प्रेक्षकांपर्यंत पोहोचवण्याचा मानस असल्याचे जिओ स्टडिओजच्या वतीने सांगण्यात आले होते. जिओची प्रस्तुती असलेल्या या नव्या उपक्रमात मराठी चित्रपटसृष्टीतील गाजलेले आणि पुरस्कारप्राप्त चित्रपटही या ओटीटी वाहिनीवर प्रदर्शित केले जाणार आहेत. यात ‘बाईपण भारी देवा’, ‘गोदावरी’, ‘मी वसंतराव’ या चित्रपटांचा समावेश आहे. तसेच, ‘फोर ब्लाइंड मेन’, ‘वनटूथ्रीफोर’, ‘खरवस’, ‘काटा किर्र्र’, ‘खाशाबा’ या नव्या कोऱ्या मराठी चित्रपटांची पर्वणी प्रेक्षकांना अनुभवता येणार आहे. याशिवाय ‘कालसूत्र’, ‘एका कलेचे मणी’, ‘अगं आई अहो आई’ या मराठीतील नव्या वेब मालिकांचाही समावेश आहे.

मराठीतील सर्व मनोरंजन बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.
Web Title: Me vasantrao first marathi film to be released on jio studio zws