रणवीर सिंग शिकतोय‘म मराठीचा’!

संजय लीला भन्सालीच्या आगामी ‘बाजीराव मस्तानी’ या चित्रपटात रणवीर सिंग महत्त्वाची भूमिका करतो आहे. या भूमिकेसाठी रणवीरने मराठी शिकायला सुरुवात केली आहे. महाराष्ट्राच्या इतिहासातील बाजीराव पेशवे आणि मस्तानी यांच्या प्रेमकहाणीवर भन्साली यांनी या चित्रपटाची जुळवाजुळव सुरू केली आहे. बाजीराव पेशवे ही भूमिका रणवीर करणार असून त्यासाठी त्याने अभ्यासाला सुरुवात केली आहे.
रणवीरची बाजीरावांची भूमिका करतो आहे. बाजीरावांचे मराठीपण ठळकपणे दिसणे गरजेचे आहे. त्यामुळेच रणवीरचे बोलणे, मराठी उच्चार, संवादफेक अधिक प्रभावी व्हावी यासाठी चित्रपटाचे संवादलेखक प्रकाश कपाडिया यांनी रणवीरला मराठीची खास शिकवणी लावली असल्याचे सांगण्यात येते.
भन्साली यांनी चित्रिकरणाला अद्याप सुरुवात केलेली नाही. रणवीरला मराठी थोडेफार समजते. तोडकेमोडके मराठी तो बोलूही शकतो. पण बाजीराव रंगवण्यासाठी सफाईदार आणि जुन्या धाटणीचे मराठी येणे आवश्यक आहे. ती भूमिकेचीही गरज आहे. चित्रिकरण सुरू झाल्यानंतर रणवीरचे मराठी बोलणे, उच्चार यात कोणतीही अडचण येऊ नये यासाठी आत्तापासूनच त्याने मराठीचे धडे गिरविणे सुरू केले आहे. रणवीरला मराठी शिकविण्यासाठी एका शिक्षकाची नियुक्ती करण्यात आली असून रणवीरच्या घरी जाऊन त्याला सध्या मराठीचे धडे देणे सुरू झाले आहे. रणवीरची सध्याची जी प्रतिमा प्रेक्षकांसमोर आहे, त्यापेक्षा तो वेगळा दिसावा आणि मुख्य म्हणजे बाजीराव म्हणून शोभून दिसावा यासाठी संजय लीला भन्सालीचा प्रयत्न आहे.