Maharashtrachi Hasyajatra : ‘महाराष्ट्राची हास्यजत्रा’ हा विनोदी कार्यक्रम जगभरात लोकप्रिय आहे. या कार्यक्रमातील कलाकारांनी यंदाची दिवाळी एका अत्यंत खास ठिकाणी आणि प्रेरणादायी पद्धतीने साजरी केली आहे. नेहमीच प्रेक्षकांच्या चेहऱ्यावर हास्य फुलवणारी ही टीम दिवाळीचा आनंद गरजू लोकांपर्यंत पोहोचवण्यासाठी मुंबईतील बोरिवली येथील सिटीझन वेलफेर असोसिएशन या वृद्धाश्रमामध्ये (Old Age Home) पोहोचली होती.
ओंकार भोजने, शिवाली परब, वनिता खरात हे कलाकार यावेळी उपस्थित होते. यांच्याबरोबर हास्यजत्रा कार्यक्रमाचे सर्वेसर्वा निर्माते आणि दिग्दर्शक सचिन गोस्वामी तसेच लेखक निर्माते सचिन मोटे देखील उपस्थित होते. यावेळी सगळ्या कलाकारांनी या वृद्धाश्रमातील ज्येष्ठ नागरिकांची प्रेमाने विचारपूस केली, त्यांच्याबरोबर वेळ घालवला. त्यांच्याबरोबर फराळाचा आनंद देखील घेतला. नेहमी टीव्हीवर आपल्या लाडक्या विनोदवीरांना ते नेहमीच पाहतात पण आता प्रत्यक्षात त्यांना पाहताना वृद्धाश्रमातील मंडळींच्या चेहऱ्यावर छान हसू उमटलं.
हे ज्येष्ठ नागरिक आपल्या कुटुंबापासून दूर राहतात, त्यामुळे ‘महाराष्ट्राची हास्यजत्रा’ टीमच्या आगमनाने त्यांना कुटुंबातील सदस्यांचा सहवास लाभल्यासारखं वाटलं. या मंडळींनी कलाकारांशी त्यांच्या आवडत्या स्किट्सबद्दल गप्पा देखील मारल्या. याचे व्हिडीओ सध्या सोशल मीडियावर व्हायरल होत आहेत.
यावेळी आपलं मनोगत व्यक्त करताना अभिनेता ओंकार भोजने म्हणाला, “आम्ही रोज टीव्हीवर लोकांच्या चेहऱ्यावर हसू आणतो, पण आज ज्येष्ठ नागरिकांबरोबर प्रत्यक्ष दिवाळी साजरी करताना मिळालेला आनंद अवर्णनीय आहे. आज आम्हाला तो खरा आनंद मिळाला.”
‘महाराष्ट्राची हास्यजत्रा’ टीमने आपल्या कलेच्या माध्यमातून समाजात आनंद पसरवण्याचा आणि दिवाळीच्या शुभ मुहूर्तावर माणुसकीचा संदेश देण्याचा हा अनोखा प्रयत्न केला आहे. सामाजिक बांधिलकी जपत, ही टीम भविष्यातही असे उपक्रम राबवण्यासाठी उत्सुक आहे.