मुंबई : मुंबई महानगरपालिकेच्या ब्रिटिशकालीन मलबार हिल जलाशयाच्या पुनर्बांधणीसाठी तज्ज्ञ मंडळी जलाशयाची अंतर्गत पाहणी करणार आहेत. तज्ज्ञांची समिती मलबार हिल जलाशयातील कप्पा क्रमांक १ ची अंतर्गत पाहणी करणार असून जलाशयाचा कप्पा क्रमांक १ पूर्णपणे रिक्त करण्यात येणार आहे. परिणामी, दक्षिण मुंबईतील महानगरपालिकेच्या ‘ए’, ‘सी’, ‘डी’ आणि ‘जी दक्षिण’ विभाग कार्यालयांच्या हद्दीतील काही भागात १८ डिसेंबर रोजी १० टक्के पाणी कपात करण्यात येणार आहे.
हेही वाचा >>> अंधेरीतील जलवाहिनी प्रकरण : नोटीस बजावल्यानंतरही कंत्राटदाराकडून प्रतिसाद नाही
मलबार हिल जलाशयाच्या पुनर्बांधणी प्रकल्पानंतर जलाशयाची क्षमता १५० दशलक्ष लिटरवरून १९० दशलक्ष लिटरपर्यंत वाढविण्याचा महानगरपालिकेचा मानस आहे. मात्र, या कामादरम्यान मोठ्या प्रमाणात झाडांची कत्तल होणार असल्याचे समजताच संबंधित परिसरातील नागरिक व पर्यावरणप्रेमींनी या प्रकल्पाला विरोध करायला सुरुवात केली. त्यामुळे महानगरपालिकेने योग्य कार्यपद्धती सुचविण्यासाठी आयआयटी पवईचे प्राध्यापक, स्थानिक तज्ज्ञ नागरिक, महानगरपालिका अधिकारी यांचा समावेश असलेल्या तज्ज्ञ समितीची स्थापना केली. ही समिती टप्प्याटप्प्याने मलबार जलाशयाची पाहणी करणार आहे. या पाहणीचा पहिला टप्पा ७ डिसेंबर रोजी पूर्ण झाला होता. तज्ज्ञ समितीमधील सदस्य १८ डिसेंबर रोजी सकाळी ८ ते १० या वेळेत जलाशयाची अंतर्गत पाहणी करणार आहेत. त्यामुळे मलबार हिल व आझाद मैदान जलाशयातून पाणीपुरवठा करण्यात येणाऱ्या महानगरपालिकेच्या ‘ए’, ‘सी’, ‘डी’ आणि ‘जी दक्षिण’ विभाग कार्यालयांच्या अखत्यारितील विविध विभागांमध्ये १८ डिसेंबर रोजी १० टक्के पाणीकपात करण्यात येणार आहे. तसेच आवश्यकता भासल्यास जलाशयातील पाणीपातळी लक्षात घेऊन विभागवार पाणीपुरवठ्याच्या वेळेत बदल करण्यात येणार आहे. पाणीकपातीच्या कालावधीत नागरिकांनी पाण्याचा जपून वापर करावा, असे आवाहन मुंबई महानगरपालिकेकडून करण्यात आले आहे.